لاہور کے علاقے اچھرہ بازار میں ماں بیٹی پر ٹرانسفارمر گر گیا جس کے نتیجے میں خاتون جاں بحق ہوگئیں۔
اے آر وائی نیوز کے مطابق لاہور کے اچھرہ بازار میں ٹرانسفارمر گرنے سے ماں جاں بحق جبکہ ان کی بیٹی زخمی ہوگئی، زخمی ہونے والی تین سالہ بچی سروسز اسپتال میں زیر علاج ہے۔
پولیس کا کہنا ہے کہ دونوں ماں بیٹی بازار میں خریداری کرنے آئی تھیں کہ اچانک ان پر ٹرانسفارمر آن گرا۔
ریسکیو ذرائع کا کہنا ہے کہ صبا نامی خاتون کو اسپتال منتقل کیا گیا تھا جہاں وہ زخموں کی تاب نہ لاتے ہوئے چل بسیں۔
پولیس اور ریسکیو کی ٹیموں نے جائے وقوعہ پر پہنچ کر واقعے کی تحقیقات شروع کردیں۔
ذرائع کا کہنا ہے کہ لیسکو حکام کی نااہلی کی وجہ سے ٹرانسفارمر گرا، پول پر ٹرانسفارمر نصب ہیں جن کی حالت کافی پرانی ہے اور ان کی مرمت بھی نہیں کی جاتی۔
پولیس حکام کے مطابق جس وقت ٹرانسفارمر گرا اس وقت بازار میں کافی رش ہوتا ہے، پولیس کا کہنا ہے کہ واقعے کی مزید تحقیقات جاری ہیں۔
