کراچی کے علاقے نیپا چورنگی کے قریب تیز رفتار ڈمپر نے ایک اور شہری کو روند ڈالا۔
اے آر وائی نیوز کے مطابق کراچی کے علاقے یونیورسٹی روڈ نیپا چورنگی کے قریب تیز رفتار ڈمپر نے شہری کو کچل ڈالا، شہری کی شناخت 40 سالہ گل شیر کے نام سے ہوئی۔
ریسکیو ذرائع کا کہنا ہے کہ شہری کا چہرہ بری طرح کچلا گیا، پولیس کا کہنا ہے کہ ڈمپر ڈرائیور کی گرفتاری کے لیے چھاپے مارے جارہے ہیں لیکن شہریوں کو بھی احتیاط کرنی چاہیے کہ پیڈسٹرین برج سے سڑک کراس کریں تاکہ حادثاتہ کی روک تھام ہوسکے۔
حادثے میں جاں بحق ہونے والے شخص کی لاش کو ضابطے کی کارروائی کے لیے اسپتال منتقل کردیا گیا ہے۔
واضح رہے کراچی میں ٹریفک حادثات میں روزانہ درجنوں افراد زندگی کی بازی ہار جاتے ہیں، شہریوں کی جانب سے ڈمپر اور ٹرک ڈرائیور کو تشدد کا نشانہ بنانے کے بعد ان کے ڈمپر کو بھی آگ لگادی جاتی ہے۔
یاد رہے کہ چند ماہ قبل بھی کراچی کے علاقے گلشن اقبال بیت المکرم مسجد کے قریب تیز رفتار ڈمپر نے کم عمر نوجوان کو کچل دیا تھا، شہریوں نے ڈمپر کو آگ لگادی تھی جبکہ ڈرائیور فرار ہونے میں کامیاب ہوگیا تھا۔
اس سے قبل بھی کراچی کے علاقے ڈی ایچ اے فیس ٹو میں ڈمپر نے موٹر سائیکل پر جانے والے تین بہن بھائیوں کو کچل دیا تھا۔
