لاہور: آسٹریلیا کی سیکیورٹی ٹیم نے پاکستان میں سیکیورٹی انتظامات پر اطمینان کا اظہار کردیا۔
اے آر وائی نیوز کے مطابق آسٹریلوی سیکیورٹی ٹیم نے پنجاب سیف سٹیز اتھارٹی کا دورہ کیا، ٹیم کو میچز کے دوران سیکیورٹی انتظامات پر بریفنگ دی گئی۔
پی سی بی حکام کی جانب سے جدید ٹیکنالوجی کے استعمال، سیکیورٹی اداروں میں تعاون سے متعلق بریفنگ دی گئی۔
آسٹریلوی سیکیورٹی ٹیم کو پاکستان کا دورہ کرنے والی ٹیموں کو دی جانے والی سیکیورٹی کی ویڈیو بھی دکھائی گئی، آسٹریلین سیکیورٹی ٹیم نے کیمروں کی مدد سے شہر بھر کی مانیٹرنگ کا جائزہ لیا۔
مزید پڑھیں: آسٹریلوی سیکیورٹی وفد کا دورہ پاکستان، صورت حال کا جائزہ
آسٹریلوی سیکیورٹی ٹیم میں ڈریو بریڈن، بین اولیور اور بیلے اسٹورٹ شامل ہیں، ٹیم کو سیف سٹیز اتھارٹی نے یادگار شیلڈ بھی پیش کی۔
آسٹریلوی وفد کراچی میں پاک ویسٹ انڈیز ٹی ٹوئنٹی سیریز کےمیچز بھی دیکھےگا، آسٹریلیا کو آئندہ سال مارچ میں مکمل سیریزکے لیے پاکستان کا دورہ کرنا ہے۔
واضح رہے کہ ویسٹ انڈیز کی ٹیم ٹی 20 اور ون ڈے سیریز کھیلنے کے لیے کراچی پہنچ چکی ہے، پاکستان اور ویسٹ انڈیز کے درمیان پہلا ٹی 20 میچ 13 دسمبر کو کھیلا جائے گا۔
