کراچی میں خاتون اور بچی مبینہ طور پر تیسری منزل سے گر کر جاں بحق ہوگئیں۔
اے آر وائی نیوز کے مطابق کراچی کے علاقے منگھوپیر میں خاتون مبینہ طور پر بیٹی کے ساتھ تیسری منزل کے فلیٹ سے کود گئی جس کے نتیجے میں دونوں موقع پر ہی جاں بحق ہوگئیں۔
پولیس کا کہنا ہے کہ فور کے چورنگی کے نزدیک صائمہ عربین ولاز کے فلیٹ میں مقیم خاتون نے ممکنہ طور پر پہلے چار سال کی بچی کو نیچے پھینکا اور پھر خود بھی کود گئی جس سے دونوں موقع پر جاں بحق ہوگئے۔
خاتون کی شناخت 35 سالہ مدیحہ کے نام سے ہوئی جبکہ بچی کی عمر چار سال بتائی گئی ہے۔
پولیس کے مطابق اہل محلہ کی جانب سے معلومات فراہم نہیں کی جارہیں، واقعے کی تحقیقات جاری ہیں۔
ذرائع کے مطابق واقعے کی تحقیقات کے لیے کرائم سین یونٹ کو طلب کرلیا گیا، پولیس قتل اور خودکشی دونوں پہلوؤں سے واقعے کی تحقیقات کررہی ہے۔
پولیس کا کہنا ہے کہ خاتون اور بچی کی لاش کو ضابطے کی کارروائی کے لیے عباسی شہید اسپتال منتقل کردیا گیا ہے۔
پولیس کا کہنا ہے کہ بظاہر یہ واقعہ خودکشی کا لگ رہا ہے لیکن قتل کے زاویے سے بھی واقعے کی تحقیقات کی جارہی ہیں۔
