عید کے دن ملک کے مختلف علاقوں میں ٹریفک حادثات میں ایک ہی خاندان کے تین افراد سمیت 6 جاں بحق جب کہ 9 زخمی ہو گئے۔
اوکاڑہ کے گاؤں 33 فور ایل کے قریب گاڑی نے موٹر سائیکل کو ٹکر مار دی، جس کے نتیجے میں موٹر سائیکل پر سوال میاں بیوی اور بچی جاں بحق ہوگئے جب کہ موٹر سائیکل سوار فرار ہونے میں کامیاب ہو گیا۔
حادثہ کی اطلاع ملتے ہی پولیس اور ریسکیو ادارے جائے وقوعہ پر پہنچ گئے اور لاشوں کو اسپتال منتقل کیا۔
نواب شاہ میں قومی شاہرہ پجومیل اسٹاپ کے قریب کار اور موٹر سائیکل میں تصادم کے نتیجے میں دو افراد جاں بحق جب کہ ایک شخص زخمی ہوگیا۔
ٹبہ سلطان پور کے نواحی علاقے میں گاڑی درخت سے ٹکرا گئی، جس کے نتیجے میں 13 سالہ لڑکا جاں بحق ہو گیا۔ پولیس کا کہنا ہے کہ لڑکا والدی کی موجودگی میں خود گاڑی ڈرائیو کرنے کی کوشش کر رہا تھا جس کے نتیجے میں یہ حادثہ رونما ہوا۔
اس کے علاوہ ساہیوال میں فیصل آباد روڈ پر دو موٹر سائیکلیں آپس میں ٹکرانے کے بعد کار سے ٹکرا گئیں۔ اس حادثے کے نتیجے میں بچے زخمی ہوگئے۔
ریسکیو اداروں نے زخمی بچوں کو قریبی اسپتال منتقل کیا جہاں اسپتال ذرائع کے مطابق دو بچوں کی حالت تشویشناک ہے۔
صفدر آباد کے نواحی علاقے میں 2 موٹر سائیکلوں میں ٹکر کے نتیجے میں دو خواتین سمیت چار افراد زخمی ہوگئے جنہیں اسپتال منتقل کر دیا گیا۔
