کراچی: شہر قائد کے علاقے سائٹ ایریا میں فیکٹری کے کیمیکل ٹینک میں ڈوب کر 6 مزدور جاں بحق ہوگئے۔
اے آر وائی نیوز کی رپورٹ کے مطابق کراچی کے علاقے سائٹ ایریا نورس چورنگی کے قریب کپڑا فیکٹری کے کیمیکل ٹینک میں 6 مزدور ڈوب کر جاں بحق ہوگئے، پولیس نے جائے وقوعہ پر پہنچ کر تحقیقات شروع کردیں۔
ریسکیو حکام کے مطابق سائٹ ایریا کمپنی کیمیکل کے ٹینک میں کام کے دوران ڈوب کر جاں بحق ہونے والے 6 مزدوروں کو ایمبولینس کے ذریعے عباسی اسپتال منتقل کردیا گیا۔
ریسکیو ذرائع کے مطابق لاشوں کو دیکھ کر لگتا ہے کہ ڈوبنے والے افراد کئی گھنٹوں سے ٹینک میں تھے۔
پولیس حکام کے مطابق جاں بحق ہونے والوں میں رمیش ، بورا ، نصیب ، شعیب ، گرداری اور کشن شامل ہیں فیکٹری کے ٹینک کی صفائی چل رہی تھی اس دوران مزدور ڈوب گئے۔
فیکٹری ملازم نے گفتگوکرتے ہوئے بتایا کہ فیکٹری میں انسانی جان کی کوئی قدر نہیں، ڈوبنے والے افراد رات کو آئے تھے فیکٹری مالک کا رویہ محنت کشوں کے بارے میں اچھا نہیں کوئی خیال نہیں رکھا جاتا آج والے واقعہ کی وجہ سے بہت دکھی ہوں اس لئے یہ بات کررہا ہوں اور فیکٹری چھوڑ رہا ہوں۔
ریسکیو اہلکارکے مطابق ٹینک سے 6 لاشیں نکالی جن کی حالت بہت بری تھی یہی لگتا ہے شاید بہت پہلے سے یہ افراد ڈوبے ہوئے تھے۔
پولیس کا کہنا ہے کہ واقعے کی تحقیقات کا آغاز کردیا گیا ہے، فیکٹری مالک ورکز اور عینی شاہدین کے بیان قلمبند کیے جائیں گے، اگر ضرورت ہوئی تو بالکل قانونی کارروائی کریں گے۔
