کراچی کے علاقے محمود آباد میں گھر میں حادثاتی طور پر گولی چلنے سے چھ سالہ بچہ انتقال کرگیا، دوسرے واقعے میں موٹر سائیکل سوار مسلح افراد نے دو بھائیوں کو گولیاں ماردیں۔
پولیس کے مطابق محمود آباد اعظم بستی کے علاقے میں چھ سالہ برہان اپنے ہم عمر رشتہ دار بچے کے ساتھ اپنے والد کے پستول سے کھیل رہا تھا اور اچانک گولی چل گئی، جس سے وہ موقع پر ہی انتقال کرگیا۔
پولیس کے مطابق برہان کے والد کا لوڈڈ پستول گھر کے اندر رکھا ہوا تھا جو بچوں کے ہاتھ آگیا، پولیس حکام کا کہنا ہے کہ برہان کا والد محمود آباد میں فرنیچر کا کام کرتا ہے، گھر میں رکھا ہوا پستول لائسنس یافتہ ہے۔
مسلح افراد کی فائرنگ سے دو کم عمر بھائی زخمی
دوسری جانب ماڑی پور مچھر کالونی میں نامعلوم افراد نے فائرنگ کر کے دو بھائیوں کو زخمی کر دیا۔
پولیس کے مطابق ماڑی پور مچھر کالونی میں نامعلوم افراد نے فائرنگ کر کے 12 سالہ اور 14 سالہ بھائیوں کو زخمی کر دیا۔
زخمیوں کی شناخت سمیر اور ثناء اللہ کے ناموں سے ہوئی ہے، پولیس حکام کا کہنا ہے کہ موٹر سائیکل سوار نامعلوم افراد نے فائرنگ کی اور موقع سے فرار ہو گئے۔
