ریاض: سعودی عرب میں 6 سالہ بچی سانپ کے کاٹنے سے دم توڑ گئی، ابہا کے گورنر عسیر شہزادہ ترکی بن طلال نے بچی کے گھر پہنچ کر سوگوار خاندان سے اظہار تعزیت کیا۔
سعودی ویب سائٹ کے مطابق سعودی عرب میں 6 سالہ بچی کے سانپ کے ڈسنے سے ہلاکت کے واقعہ پر سوشل میڈیا پر رنج و غم کا اظہار کیا جا رہا ہے۔
یہ واقعہ ابہا میں پیش آیا جہاں بچی کو واش روم میں سانپ نے ڈس لیا۔
بچی کی والدہ نے واقعے کی تفصیلات بتاتے ہوئے کہا کہ واش روم جانے کے چند سیکنڈ بعد میری بیٹی کی چیخ کی آواز سنی، میں تیزی سے گئی تو بیٹی نے بتایا کہ چوہا اسے کاٹ کر بھاگ گیا ہے۔
والدہ کا کہنا ہے کہ انہوں نے واش روم میں ہر طرف نظر دوڑائی مگر کہیں کچھ نظر نہیں آیا، پھر بچی کے جسم پر خراش کا نشان دیکھا، ایک جگہ کاٹنے کا نشان بھی نظر آیا۔
والدین کے مطابق بچی کو فوری طور پر ابہا جنرل ہسپتال میں داخل کیا گیا، طبی معائنے سے پتہ چلا کہ اسے چوہے نے نہیں بلکہ سانپ نے ڈسا تھا۔
اہلخانہ کا کہنا ہے کہ گھر سے اسپتال جانے اور اگلی صبح تک بچی تمارا نے کسی طرح کی کوئی تکلیف محسوس نہیں کی تاہم بعد میں وہ دم توڑ گئی۔
ابہا جنرل اسپتال کے طبی عملے نے بچی کی جان بچانے کےلیے ہر ممکن کوشش کی، بلڈ ٹیسٹ سے علم ہوا کہ کوبرا کا زہر بچی کے جسم میں سرایت کرگیا تھا۔ گورنر عسیر شہزادہ ترکی بن طلال نے بھی سعودی بچی کے گھر پہنچ کر سوگوار خاندان سے اظہار تعزیت کیا۔
