بیجنگ: چینی شہری نے شدید سردرد کی وجہ سے ڈاکٹر سے رجوع کیا تو انکشاف ہوا کہ وہ 20 سال سے سر میں گولی لیے گھوم رہا ہے۔
غیرملکی خبررساں ادارے کی رپورٹ کے مطابق 28 سالہ چینی شہری ڈاکٹر کے پاس گیا تو اسے معلوم ہوا کہ اس کی کھوپڑی کے بائیں جانب کچھ ہے، جب ٹیسٹ کیے گئے تو معلوم ہوا کہ یہ گولی تھی۔
چینی شہری نے ڈاکٹروں کو بتایا کہ جب وہ 8 سال کا تھا تو وہ اور اس کا بھائی گھر میں ایئرگن سے کھیل رہے تھے، اتفاقاً ایئرگن چلی اور گولی اس کے سر پر لگی تھی۔
والدین کی ڈانٹ ڈپٹ کے ڈر سے اس نے کچھ نہیں کہا اور گھنے بالوں کی وجہ سے زخم بھی ڈھکا ہوا تھا۔
چینی شہری کا کہنا تھا کہ اسے گولی سے کوئی چوٹ نہیں آئی اور آہستہ آہستہ وہ حادثے کو بھول گیا تھا۔
دوسری جانب ڈاکٹروں نے 20 سال تک کھوپڑی میں گولی رہنے کے باوجود زندہ بچ جانے والے کو خوش قسمت قرار دیتے ہوئے آپریشن کے ذریعے اُس کے سر سے گولی نکال دی۔
