دارالحکومت اسلام آباد میں بلدیاتی انتخابات کے التوا سے قومی خزانے کو کروڑوں روپے کا نقصان ہوگیا۔
ذرائع الیکشن کمیشن کے مطابق بلدیاتی انتخابات کے التوا سے تمام تیاریاں ضائع ہوگئیں، 10 کروڑ روپے کی لاگت سے بیلٹ پیپرز چھاپے گئے تھے جو ضائع ہوگئے، انتخابی ساز وسامان پر بھی بھاری رقوم خرچ کی گئیں۔
دو روز قبل اسلام آباد میں 31 دسمبر کو ہونے والے بلدیاتی انتخابات ملتوی کیے گئے۔ الیکشن کمیشن نے سیاسی جماعتوں کا مؤقف سننے کے بعد محفوظ فیصلہ سنایا تھا۔
الیکشن کمیشن کے 5 رکنی بینچ نے اسلام آباد ہائی کورٹ کے حکم پر اسلام آباد کے بلدیاتی انتخابات سے متعلق کیس سماعت کی تھی۔ اس سلسلے میں ایڈووکیٹ جنرل جہانگیر جدون، سابق اٹارنی جنرل اشتراوصاف، پی ٹی آئی کی جانب سے بابراعوان اور علی نوازاعوان جب کہ جماعت اسلامی کی جانب سے میاں اسلم الیکشن کمیشن میں پیش ہوئے تھے۔