The news is by your side.

Advertisement

لاہور میں ملزمان نے بھائی پر تشدد کرکے بہن کو اغوا کرلیا

لاہور میں ملزمان نے بھائی کو تشدد کا نشانہ بنانے کے بعد اس کی بہن کو اغوا کرلیا۔

اے آر وائی نیوز کے مطابق لاہور کے علاقے ہنجروال میں ملزمان نعمان نامی شخص کو تشدد کا نشانہ بنانے کے بعد اس کی بہن نویرہ کو اغوا کرکے لے گئے۔

ذرائع کے مطابق ملزم مبشر اور اس کے ساتھیوں نے نعمان کو تشدد کا نشانہ بنایا، ملزمان کی جانب سے تشدد کرنے کی فوٹیج منظرعام پر آگئی۔

ویڈیو میں دیکھا جاسکتا ہے کہ ملزم مبشر اور اس کے ساتھی نعمان کو تشدد کا نشانہ بناتے ہوئے مغلظات بک رہے ہیں جبکہ متاثرہ شخص روتے ہوئے انہیں تشدد کرنے سے منع کررہا ہے۔

ذرائع کا بتانا ہے کہ متاثرہ شخص نعمان کی والدہ کوثر مقدمہ درج کروانے پہنچی تو تین روز تک پولیس نے مقدمہ درج نہیں کیا اور آج پولیس نے اغوا کا مقدمہ درج کیا ہے۔

دوسری جانب ڈی آئی جی آپریشنز نے ایس پی صدر سے واقعے کی رپورٹ طلب کرلی، سہیل چوہدری کا کہنا ہے کہ ملزمان کے خلاف مقدمہ درج کرکے گرفتاری کے لیے ٹیمیں تشکیل دے دی گئی ہیں۔

دو ملزمان گرفتار

ڈی آئی جی آپریشنز کا کہنا ہے کہ مشترکہ ٹیموں نے مرکزی ملزم سمیت دو ملزمان کو گرفتارکرلیا ہے اور دیگر ملزمان کی گرفتاری کے لیے چھاپے مارے جارہے ہیں۔

انہوں نے کہا کہ مغویہ کو بھی جلد بازیاب کروالیا جائے گا۔

 

 

Comments

یہ بھی پڑھیں