ماں کی ممتا کا قرض اولاد کبھی نہیں اتار سکتی لیکن ان کے لیے اتنا تو کرہی سکتی ہے کہ انہیں کوئی تکلیف نہ پہنچے اور ان کا خیال رکھے لیکن بھارت میں سفاک اولاد نے معمر والدہ کو گھر سے نکال دیا۔
بھارتی میڈیا رپورٹس کے مطابق ریاست کیرالا میں بچوں نے ماں کو صرف اس بات پر گھر سے نکال دیا کہ اب آپ سرکاری نوکری سے ریٹائرڈ ہو گئی ہیں تو ہم آپ کو ساتھ نہیں رکھ سکتے۔
بچوں کے برے رویے کے بعد بھارت کی ریاست کیرالہ کے علاقے ملا پرم اسکول کی استاد جو کہ اپنے وقت کی بہترین حساب کی ٹیچر ہوا کرتی تھیں اب ریلوے اسٹیشن کے باہر بھیک مانگنے لگیں۔
رپورٹ کے مطابق ایک دن ان پر ایک شاگرد کی نظر پڑی جنہہوں نے کافی عرصے ان سے تعلیم حاصل کی مگر وہ پہلی نظر میں پہچان نہیں پائیں۔
کچھ دیر بعد ان کے پاس گئیں اور ان کی خیریت دریافت کی تو انہوں نے سارا ماجرا سنا دیا جس کے بعد شاگرد کی آنکھوں میں آنسو بھر آئے اور انہوں نے انہیں کھانے پینے کو چیزیں دیں اور پہننے کو کپڑے دیے پھر وہ انہیں اپنے ساتھ لے آئیں۔
اس تمام واقعے کے بعد اسی شاگرد نے کلاس کے تمام پرانے دوستوں کو فون کیا اور ان سے آ کر ملنے کو کہا تاکہ اپنی ٹیچر کیلئے رہنے اور زندگی گزارنے کیلئے پیسوں کا بندوبست کیا جا سکے۔