لاہور میں خاتون کے اغوا برائے تاوان کا ڈراپ سین ہوگیا

لاہور میں شوہر سے جھگڑے کے بعد اپنے ہی اغوا کا ڈرامہ رچانے والی خاتون کو پولیس نے گرفتار کرلیا۔

اے آر وائی نیوز کے مطابق لاہور کے تھانہ اچرا میں بہنوئی کے ساتھ مل کر اپنے اغوا کا ڈرامہ رچانے والی لبنیٰ نامی خاتون پولیس کی گرفت میں آگئی۔

ذرائع کے مطابق 13 ستمبر کے روز خاتون کے اغوا کا جھوٹا مقدمہ درج کروایا گیا اور رہائی کے بدلے شوہر سے 10 لاکھ روپے تاوان مانگا گیا تھا۔

پولیس کے مطابق لبنیٰ نے اپنے بہنوئی محسن کے ساتھ مل کر واردات کا منصوبہ بنایا تھا۔

ملزمہ نے پولیس کو دیے گئے بیان میں بتایا کہ ’میری شوہر سے لڑائی ہوئی جس کے بعد میں اپنی کزن کے گھر گئی ادھر جاکر میں نے شوہر سے اپنے لیے پیسے مانگے تھے۔‘

پولیس کا کہنا ہے کہ ماڈل ٹاؤن ڈویژن میں اب تک اغوا کے 80 فیصد مقدمات خارج کیے جاچکے ہیں۔

Comments