اٹک میں ناخلف بیٹے نے کلہاڑی کے وار کرکے ماں کو قتل کردیا۔
اے آر وائی نیوز کے مطابق اٹک کے گاؤں جنڈکانی میں گھریلو تنازع پر ناخلف بیٹے نے اپنی سگی ماں کی جان لے لی۔
ملزم حسن بلال والدہ کو قتل کرنے کے بعد جائے واردات سے فرار ہونے میں کامیاب ہوگیا۔
پولیس کا بتانا ہے کہ مقتولہ کی لاش کو ضابطے کی کارروائی کے لیے اسپتال منتقل کردیا گیا ہے جبکہ واقعے کا مقدمہ درج کرلیا گیا ہے اور ملزم کی تلاش میں چھاپے مارے جارہے ہیں۔
واضح رہے کہ رواں برس مارچ میں لاہور میں سفاک بیٹے نے ماں کو بے دردی سے قتل کردیا تھا۔
ایس پی کینٹ کا کہنا تھا کہ ملزم نےدوران تفتیش اعتراف جرم بھی کر لیا ہے ملزم نے والدہ کے قتل کو ڈکیتی مزاحمت کا رنگ دینے کی کوشش کی تھی۔
