کراچی: نگراں وزیر اطلاعات محمد احمد شاہ اور وزیر تعلیم سندھ رعنا حسین نے چھٹے سندھ کالج گیمز 2024 کا افتتاح کر دیا۔
تفصیلات کے مطابق ڈی جے اسپورٹس کمپلکس میں نگراں صوبائی وزیر اطلاعات، اقلیتی امور اور سماجی تحفظ محمد احمد شاہ نے نگراں صوبائی وزیر تعلیم رعنا حسین کے ہمراہ مشعل جلا کر چھٹے سندھ گیمز کا افتتاح کیا۔
سندھ کے 370 کالجوں کے ہزاروں کھلاڑی اپنے اپنے علاقوں میں کھیلوں کے مختلف مقابلوں میں حصہ لے رہے ہیں، کراچی کے 154 کالجز سے 3000 کھلاڑیوں نے چھٹے سندھ کالج گیمز میں شرکت کی ہے۔
افتتاحی تقریب سے خطاب کرتے ہوئے احمد شاہ نے کہا اگر آپ سونے کا چمچہ لے کر پیدا نہیں ہوئے، چھوٹے علاقوں یا گاؤں میں رہتے ہیں تو اس سے فرق نہیں پڑتا، جو چیز آپ کو آگے لے کر جائے گی وہ آپ کی طاقت اور جذبہ ہے۔
نگراں صوبائی وزیر اطلاعات نے خواتین کھلاڑیوں سے کہا کہ آپ جب گھر سے باہر نکلیں تو آنکھیں اور گردن اوپر ہونی چاہیے، آپ کسی سے کم نہیں ہیں، خود پر یقین رکھیں، کوئی چیز آپ کے راستے کی رکاوٹ نہیں بن سکتی۔
صوبائی وزیر تعلیم رعنا حسین نے کہا چھٹے سندھ کالج گیمز کا مقصد نوجوانوں کی صلاحیتوں کو اجاگر کرنا ہے تاکہ وہ ذہنی نشوونما کے ساتھ جسمانی طور پر چاق و چو بند ہو سکیں۔ انھوں نے کہا صوبہ بھر سے 370 کالجوں کے طلبہ و طالبات ان گیمز میں صحت مندانہ مقابلے کے جذبے کے تحت ایک دوسرے کے مد مقابل ہوں گے۔
افتتاحی تقریب میں سیکریٹری کالج ایجوکیشن سندھ صدف انیس شیخ بھی شریک تھیں، سندھ گيمز یکم مارچ تک جاری رہیں گے۔
