تہران : ایران اور عراق کے سرحدی علاقوں میں 7.4 شدت کے زلزلے نے تباہی مچا دی، زلزلے سے ہلاکتوں کی تعداد530 سے زائد ہوگئی جبکہ آٹھ ہزار سے زائد افراد زخمی ہوئے ہیں۔
تفصیلات کے مطابق 3 روز قبل ایران اور عراق کے سرحدی علاقوں میں آنے والے 7.4 شدت کے زلزلے سے مذکورہ علاقہ ہولناک تباہی کا منظر پیش کر رہا ہے۔
پلک جھپکتے میں عمارتیں اور گھر ملبے کا ڈھیر بن گئے، سڑکیں، اسپتال، پل، بجلی اور مواصلات کا نظام تباہ ہوگیا، قیامت خیز زلزلے کے بعد متاثرہ علاقوں میں امدادی کارروائیاں جاری ہیں۔
آفٹر شاکس اور بجلی کی عدم فراہمی کے باعث امدادی کارروائیوں میں مشکلات کا سامنا ہے، اسپتال زخمیوں سے بھرے ہوئے ہیں۔
مختلف امدادی تنظیموں کی جانب سے زلزلہ متاثرین کو خوراک،خیمے، دوائیں اور کمبل فراہم کئے جارہے ہیں۔ واضح رہے کہ ایران اورعراق کے سرحدی علاقے میں اتوار کے روز سات اعشاریہ تین شدت کے زلزلے نے تباہی مچا دی تھی۔
زلزلے سے متاثرہ علاقوں میں ملبہ ہٹانے اورانفرا اسٹرکچر کی بحالی کا کام جاری ہے، ایران کے صدرحسن روحانی نے زلزلے سے تباہ علاقوں کا دورہ کیا اورامدادی کارروائیوں کا جائزہ لیا۔
امریکی زلزلہ پیما مرکز کے مطابق زلزلہ کی گہرائی حلب جاہ کے قریب 33 کلو میٹر تھی جبکہ زلزلے کا مرکز ایران کے سرحد کے قریب عراق کا شہر حلبجہ تھا۔
Comments
- Advertisement -
