The news is by your side.

Advertisement

گوگل میں ملازمت کی خواہش مند 7 سالہ بچی کی درخواست

آپ نے گوگل کے دفاتر میں ملازمین کو شاندار اور حیرت انگیز سہولیات دیے جانے کے بارے میں تو ضرور سنا ہوگا، اور یہ بھی سنا ہوگا کہ دنیا بھر میں پھیلے گوگل کے دفاتر نہایت خوبصورتی سے بنائے گئے ہیں اور ان میں جھیلیں، آبشاریں، پہاڑ، تھیم پارک یہاں تک کھیلنے کودنے کے لیے سلائیڈ اور گیمنگ زونز بھی موجود ہیں۔

یقیناً گوگل میں کام کرنا ہر شخص کا خواب ہوگا جہاں نہ صرف اپنی صلاحیتوں کے بھرپور اظہار کا موقع ملے گا، بلکہ وہاں کے خوبصورت دفاتر میں زندگی کا صحیح لطف آئے گا۔

شاید گوگل کے کسی دفتر میں موجود ایسے ہی کسی تھیم پارک کو دیکھ کر انگلینڈ کی رہائشی اس 7 سالہ معصوم بچی کے دل میں بھی وہاں کام کرنے کی خواہش جاگ اٹھی، اور اس نے گوگل کے سی ای او سندر پچائی کو نوکری کی درخواست لکھ کر اپنی معصومانہ خواہش کا اظہار بھی کر ڈالا۔

letter

اپنی درخواست میں اس نے لکھا، ’میں گوگل میں ملازمت کرنا چاہتی ہوں۔ میں کسی چاکلیٹ فیکٹری میں بھی کام کرنا چاہتی ہوں، اور اولمپک کے سوئمنگ پول میں تیراکی بھی کرنا چاہتی ہوں۔ مرے والد نے مجھے بتایا کہ اگر مجھے گوگل میں ملازمت مل جائے تو میں لوبیا جیسے تکیے پر بیٹھ سکتی ہوں، سلائیڈ لے سکتی اور جھولے جھول سکتی ہوں‘۔

معصوم بچی کولے درخواست میں اپنی صلاحیتوں کا اظہار کرنا بھی نہیں بھولی۔ ’مجھے کمپیوٹر بہت پسند ہیں۔ میرے پاس ایک ٹیبلیٹ ہے جس پر میں گیمز کھیلتی ہوں۔ اس میں ایک گیم ہے جس میں ایک روبوٹ کو حرکت دینی ہوتی ہے۔ میرے والد نے مجھ سے کہا ہے کہ میرے لیے کمپیوٹرز کے بارے میں جاننا اچھا ہے اور وہ جلد میرے لیے ایک کمپیوٹر بھی خریدیں گے‘۔

ساتھ میں اس بچی نے گوگل کے سی ای او کو یہ بھی بتایا کہ وہ کس قدر قابل ہے، ’میرے استاد میرے امی ابو کو بتاتے ہیں کہ میں پڑھنے میں بہت اچھی ہوں۔ میری اسپیلنگ بھی اچھی ہے، اور میں ریاضی کے سوالات بھی اچھے طریقے سے حل کرتی ہوں‘۔

اس بچی نے یہ بھی بتایا کہ وہ اپنے گھر میں واحد فرد ہے جو اس ملازمت کے لیے نہایت موزوں ہے، ’میری ایک 5 سال کی بہن بھی ہے، وہ بہت چالاک ہے لیکن اسے صرف گڑیوں سے کھیلنے اور اچھے کپڑے پہننے کا شوق ہے‘۔

جب یہ خط سندر پچائی کوموصول ہوا تو انہوں نے اس بچی کو جواباً نہایت خوبصورت خط لکھا، ’مجھے جان کر بہت خوشی ہوئی کہ آپ کمپیوٹرز اور روبوٹس کو پسند کرتی ہیں۔ اگر آپ اسی طرح محنت کرتی رہیں تو ایک دن ضرور آپ گوگل میں ملازمت حاصل کرنے کا خواب پورا کرلیں گی‘۔

letter-2

انہوں نے مزید لکھا، ’میں آپ کے اسکول کی تعلیم مکمل ہونے کے بعد آپ کی ملازمت کی درخواست کا انتظار کروں گا‘۔

بچی کو جب یہ خط موصول ہوا تو یہ اس کے لیے کسی گرین سگنل سے کم نہیں تھا۔ وہ گوگل میں ملازمت حاصل کرنے کے لیے مزید پرجوش ہوگئی۔

بچی کے والد نے بھی اس خوبصورت حوصلہ افزائی کے لیے گوگل کے سی ای او کا شکریہ ادا کیا۔

Print Friendly, PDF & Email

Comments

comments

یہ بھی پڑھیں