اسلام آباد: وزیراعظم شہباز شریف سے اتحادی جماعتوں کے رہنماؤں کی ملاقات کا احوال سامنے آگیا ہے۔
اے آر وائی نیوز کے مطابق وزیراعظم شہباز شریف سے اتحادی جماعتوں کے رہنماؤں کی ملاقات میں پی ٹی آئی پر پابندی لگانے پر بھی غور کیا گیا تاہم پیپلزپارٹی اور دوسری جماعتوں نے اس کی مخالفت کردی۔
ذرائع کا بتانا ہے کہ اکثریت نے کہا کہ عمران خان کے بیانیے سے بلیک میل نہیں ہونا چاہیے ہمیں ڈرنے کی ضرورت نہیں پی ٹی آئی خود ہی ایکسپوز ہورہی ہے۔
اکثریت نے قومی اور صوبائی اسمبلی کے انتخابات اکٹھے ہونے کی رائے دی جبکہ چند رہنماؤں نے عمران خان کو عدالتوں سے فوری ریلیف پر سوال اٹھایا۔
پی ڈی ایم رہنما نے کہا کہ ہم حیران ہیں کہ کس طرح عمران خان کو فوری ریلیف مل جاتا ہے۔
ذرائع کا بتانا ہے کہ عمران خان جو مرضی کرلے اسے ضمانتیں مل جاتی ہیں جبکہ چند رہنماؤں نے غریبوں کو ریلیف کے لیے بڑے اقدامات کی تجاویز دیں۔
