اسلام آباد: حکومت نے توہین عدالت سے متعلق قانون کو تبدیل کرنے کے لیے تیاریاں شروع کردیں۔
اے آر وائی نیوز کے مطابق توہین عدالت سے متعلق قانون میں تبدیلی کے لیے وزارت قانون آئین کے آرٹیکل 204 کے تحت ترمیم پیش کرے گی۔
ذرائع کا بتانا ہے کہ توہین عدالت بل پارلیمنٹ سے منظور کروایا جائے۔
وزارت قانون ذرائع کا بتانا ہے کہ آرٹیکل 204 میں توہین عدالت سے متعلق عدالتی اختیارات واضح ہیں، دو تہائی اکثریت سے توہین عدالت قانون کی شق نکالی جاسکتی ہے۔
ذرائع کا بتانا ہے کہ الیکشن کمیشن کو فنڈز کی فراہمی اور سیکیورٹی پلان نہ دینے پر توہین عدالت سے بچنے کے لیے حکومت کی جانب سے قانون میں تبدیلی کے لیے تیاریاں کی جارہی ہیں۔
واضح رہے کہ پنجاب انتخابات کے لیے وزارت خزانہ کو 10 اپریل تک الیکشن کمیشن کو فنڈز دینا ہیں جبکہ 11 اپریل کو الیکشن کمیشن رپورٹ سپریم کورٹ میں جمع کروائے گا۔
یاد رہے کہ توہین عدالت کا قانون 2012 میں بھی تبدیل کیا گیا تھا۔
