سابق صدر و پیپلزپارٹی کے شریک چیئرمین آصف علی زرداری کا کہنا ہے کہ پورے ملک کے جیالے تیاری کریں مستقبل جیالوں کا ہے۔
اے آر وائی نیوز کے مطابق پیپلزپارٹی کے شریک چیئرمین آصف علی زرداری نے سندھ کے بلدیاتی انتخابات میں کامیابی پر مبارک باد دیتے ہوئے کہا کہ کوئی شک نہیں کہ جیالے اپنی قیادت کی طرح بہادر ہیں، سندھ میں جیت کارکنوں کی بہترین خدمات کا نتیجہ ہے۔
انہوں نے کہا کہ کراچی کے جیالوں نے شاندار کارکردگی دکھائی ہے، پیپلزپارٹی کے کارکن اور حامی بلاول بھٹو کی طاقت ہیں۔
آصف زرداری نے کہا کہ ہم بھرپور تیاری سے عام انتخابات لڑیں گے، بلاول نے بطور وزیر خارجہ اپنی صلاحیتوں کا لوہا منوایا ہے وہ اپنی عظیم والدہ کی طرح چاروں صوبوں کی زنجیر ہے۔
انہوں نے مزید کہا کہ دھمکیوں کے باوجود بلاول بھٹو بھارت گئے۔
واضح رہے کہ سندھ کے چوبیس اضلاع میں ہونے والے ضمنی بلدیاتی الیکشن میں 93 حلقوں پر پاکستان پیپلز پارٹی نے سب سے زیادہ 67 نشستوں پر کامیابی حاصل کر لی۔
جماعت اسلامی کو 9 نشستیں ملیں، پی ٹی آئی نے 4 نشستوں پر کامیابی حاصل کی، گرینڈ ڈیموکریٹک الائنس (جی ڈی اے) اور مسلم لیگ ن نے ایک ایک نشست پر کامیابی حاصل کی۔
ادھر کراچی کی 246 یونین کونسلز میں سے 240 میں الیکشن نتائج مکمل ہو گئے ہیں، پاکستان پیپلز پارٹی 98 یوسیز میں کامیابی کے ساتھ سب سے بڑی جماعت بن گئی ہے، 87 یوسیز میں کامیاب جماعت اسلامی دوسرے نمبر پر ہے، جب کہ پی ٹی آئی نے 43 یوسیز میں کامیابی حاصل کی۔
