The news is by your side.

Advertisement

فوڈ ڈلیوری کا کام کرنے والے 73 سالہ بزرگ

اسلام آباد: وفاقی دارالحکومت اسلام آباد کے رہائشی 73 سالہ فیاض اختر نے فوڈ ڈیلیوری سروس کے ساتھ کام کر کے سب کو حالات سے لڑنے کا سبق دے دیا۔

تفصیلات کے مطابق اسلام آباد کے رہائشی 73 سالہ فیاض اختر نے اے آر وائی نیوز کے مارننگ شو باخبر سویرا میں شرکت کی اور اپنے حالات زندگی کے بارے میں بتایا۔

فیاض اختر نے 27 سال تک وزارت خزانہ میں ڈیوٹی سر انجام دی اب ریٹائرمنٹ کے بعد بھی وہ کام کرنے پر مجبور ہیں۔ فیاض اختر فوڈ ڈلیوری سروس فوڈ پانڈا کے ساتھ بطور ڈلیوری رائیڈر کام کر رہے ہیں۔

انہوں نے بتایا کہ ان کا ایک بیٹا، بہو اور 3 پوتے ہیں جبکہ اہلیہ بھی حیات ہیں۔

فیاض اختر کے مطابق انہوں نے بیٹے کو ایک دکان کھلوا کر دی تھی لیکن کرونا وائرس کی وجہ سے وہ نہیں چل سکی، جس کے بعد انہوں نے خود ہی کام کرنا شروع کردیا۔

 

View this post on Instagram

 

A post shared by ARY News (@arynewstv)

انہوں نے بتایا کہ مارکیٹس بند ہونے کی وجہ سے ان کی ساری جمع پونجی بھی خرچ ہوتی گئی، اب وہ 13 لاکھ روپے کے مقروض ہیں جن میں سے 9 لاکھ روپے کا قرض وہ اتار چکے ہیں۔

فیاض اختر نے بتایا کہ وہ گھر میں بیکار بیٹھے ہوئے تھے لہٰذا وہ خود ہی فوڈ پانڈا والوں کے پاس گئے اور ان سے کہا کہ وہ کام کرنا چاہتے ہیں جس کے بعد کمپنی نے انہیں ملازمت پر رکھ لیا۔ وہ دوپہر ڈیڑھ بجے سے کام شروع کرتے ہیں اور رات 10 بجے تک کام کرتے ہیں۔

انہوں نے بتایا کہ جب سے ان کی تصاویر سوشل میڈیا پر وائرل ہوئی ہیں انہیں بہت سے افراد نے رابطہ کر کے مدد کی پیشکش کی ہے جس کے لیے وہ بے حد شکر گزار ہیں۔

Comments

یہ بھی پڑھیں