لاڑکانہ میں 15 خطرناک قیدی سب جیل کی چھت توڑ کر فرار ہوگئے۔
اے آر وائی نیوز کے مطابق 15 خطرناک قیدی سب جیل قمبر کی چھت توڑ کر فرار ہوئے جبکہ ڈیوٹی میں غفلت برتنے پر سات اہلکاروں کو گرفتار کرکے مقدمہ درج کرلیا گیا ہے۔
فرار ہونے والے قیدیوں میں چوری اور قتل کیسز کے قیدی شامل ہیں۔
اطلاع ملنے پر ایس ایس پی نے سب جیل قمبر کا معائنہ کیا اور واقعے کا ذمہ دار جیل انتظامیہ کو قرار دیا اور فوراً کارروائی کرتے ہوئے سات اہلکاروں کو لاک اپ کروادیا۔
ایس ایس پی نے فرار ہونے والے قیدیوں کی گرفتاری کے لیے ٹیمیں تشکیل دے دی ہیں، ان کا کہنا ہے کہ سب قیدیوں کو جلد گرفتار کرلیا جائے گا۔
واضح رہے کہ گزشتہ ماہ بلوچستان کے شہر چمن میں 17 قیدی سب جیل توڑ کر فرار ہوگئے تھے۔
فجر کی نماز کے لیے بیرک سے نکالے گئے قیدیوں نے پولیس سے اسلحہ چھین کر فائرنگ شروع کر دی تھی، قیدیوں نے فائرنگ کر کے ایک اہلکار کو زخمی کر دیا تھا۔
ذرائع کا کہنا تھا کہ سب جیل پر صرف 2 اہلکار تعینات تھے جب کہ جیل میں 300 سے زائد قیدی موجود تھے، پولیس نے قیدیوں کی دوبارہ گرفتاری کے لیے سرچ آپریشن شروع کر دیا تھا۔
