کراچی : سندھ میں کورونا وائرس سے ایک روز میں ریکارڈ 74 اموات سامنے آئیں ، جس کے بعد صوبے میں انتقال کرنے والوں کی تعداد 1343 تک جا پہنچی۔

تفصیلات کے مطابق وزیراعلیٰ سندھ مراد علی شاہ نے کورونا وائرس کی صورتحال سے متعلق بیان میں کہا شدید دکھ سےبتا رہا ہوں مزید74 مریض انتقال کرگئے، سندھ میں تاحال یہ انتقال کرنے والوں کی سب سے بڑی تعداد ہے، جس کے بعد کورونا سے صوبے میں انتقال کرنے والوں کی تعداد 1343 ہوگئی ہے۔

وزیراعلیٰ سندھ کا کہنا تھا کہ 24گھنٹے میں8464 نمونے ٹیسٹ کیے گئے اور 1539 نئے کورونا کیس سامنےآئے، تاحال 4لاکھ 43ہزار 757ٹیسٹ کیے جا چکے ہیں اور کورونا کے اب تک 81ہزار955 مریض سامنے آچکے ہیں۔

مراد علی شاہ نے کہا کہ صوبےمیں35ہزار26کورونامریض زیرعلاج ہیں، 33ہزار482مریض گھروں میں اور88آئسولیشن مراکزمیں زیرعلاج ہیں جبکہ 660 مریضوں کی حالت تشویشناک اور 92 مریض وینٹی لیٹرز پر ہیں۔

صوبے میں صحت یاب ہونے والوں کے حوالے سے ان کا کہنا تھا کہ 24گھنٹےمیں 1093 مریض صحت یاہوکر گھروں کوچلے گئے، صحت یاب افرادکی تعداد 45ہزار616 ہوچکی ہے جبکہ کراچی میں مزید689 کورونا کیسز سامنے آئے۔