کراچی کے علاقے گلستان جوہر میں ڈکیتی کے دوران فائرنگ کی زد میں آکر زخمی ہونے والی 5 سالہ بچی کی ویڈیو سامنے آگئی۔
اے آر وائی نیوز کے مطابق گزشتہ روز کراچی کے علاقے گلستان جوہر کامران چورنگی کے قریب ڈاکو شہری سے لوٹ مار کررہے تھے اس دوران شہری نے فائرنگ کی تو ڈاکوؤں نے جوابی فائرنگ کی جس کی زد میں آکر 5 سالہ بچی انعم زخمی ہوگئی تھی۔
ویڈیو میں دیکھا جاسکتا ہے کہ انعم دوسرے بچوں کے ساتھ سڑک سے گزر رہی ہے اور گولی لگنے سے وہ گر گئی جسے قریب موجود لوگوں نے اٹھا کر نجی اسپتال منتقل کیا۔
گلستان جوہر میں اسٹریٹ کرمنلز کی فائرنگ سے 5 سالہ بچی زخمی، فوٹیج سامنے آگئی#ARYNews pic.twitter.com/D3iqkYjB79
— ARY NEWS (@ARYNEWSOFFICIAL) September 7, 2023
پولیس کا کہنا ہے کہ بچی کے کندھے پر گولی لگی تھی جس کی حالت اب خطرے سے باہر ہے اسے کچھ روز میں ڈسچارج کردیا جائے گا۔
دوسری جانب عینی شاہدین کا کہنا تھا کہ دو موٹر سائیکلوں پر پانچ افراد ڈکیتی کی واردات کررہے تھے، 5 سالہ انعم دکان سے چیز لے کر آتے ہوئے فائرنگ کی زد میں آئی۔
عینی شاہد کا کہنا تھا کہ ڈکیتی سے متاثرہ شہری ہی زخمی بچی کو نجی اسپتال لے کر گیا۔
