کراچی: پیسے بچانا اور انہیں محفوظ کرنا ہر کسی کی خواہش ہوتی ہے مگر کسی بھی شخص کے لیے یہ کام بہت مشکل ہے کیونکہ بظاہر آسان سمجھی جانے والی عادت پر عمل کرنا دشوار بھی ہوتا ہے تاہم ہم آپ کو بتاتے ہیں وہ آسان طریقے جن پر عمل کرتے ہوئے آپ نئے سال کے پہلے ہی ماہ سے پیسے محفوظ کرسکتے ہیں۔
نئے سال کو اچھا ، یادگار اور خوشحال بنانے کے لیے لوگ مختلف عہد کرتے ہیں کچھ تو اس میں کامیاب ہوجاتے ہیں مگر کچھ کو خاطر خواہ کامیابی نہیں مل پاتی۔
آئیے ہم آپ کو بتاتے ہیں کہ نئے سال کے پہلے ہی ماہ سے کفایت شعاری کرتے ہوئے پیسے کس طریقے سے محفوظ کیے جائیں۔
رقم محفوظ کریں
سب سے پہلے تو آپ یہ پکا عہد کریں کہ تنخواہ یا جیب خرچ میں سے یومیہ کچھ رقم علیحدہ سے محفوظ کریں گے تاکہ ضرورت کے وقت کچھ رقم آپ کے پاس موجود رہے۔
ہفتہ وار بجٹ
مہینے کا آغاز ہوتے ہی ہفتہ وار بجٹ شیٹ تیار کریں اور اس بات کو مدنظر رکھیں کہ صرف ضروری اشیاء ہی اس میں شامل کریں اور اس شیٹ پر پابندی سے عمل کریں۔
اخراجات لکھیں اور موازنہ کریں
یومیہ اور ہفتہ وار اخراجات لکھیں تاکہ آپ کو اندازہ ہو کہ دن بھر میں یا پھر ہفتے میں آپ نے کتنی رقم خرچ کی اور ان میں سے کتنے پیسے غیر ضروری خرچ ہوئے۔
سگریٹ نوشی ترک کریں
سگریٹ یا تمباکو نوشی کرنے والے حضرات اس بات سے بخوبی واقف ہیں کہ اُن کے بجٹ کی ایک تہائی رقم فضول اخراجات میں خرچ ہوتی ہے، سگریٹ نوشی ویسے بھی اچھا فعل نہیں اس لیےنئے سال میں اس بری لت سے ضرور چھٹکارا حاصل کریں۔
خریداری سے پہلے سوچیں
آپ نے بجٹ شیٹ تیار کرلی اور حساب کتاب لکھنا شروع کردیا اُس کے باوجود بھی اکثر اوقات غیر ضروری چیز آپ کو اپنی طرف راغب کرے گی مگر کوئی بھی چیز خریدنے سے پہلے ایک بار ضرور سوچیں کہ آیا اس کی آپ کو کتنی ضرورت ہے؟۔
مقدار پر نہ جائیں بلکہ معیاری اشیاء خریدیں
کوئی بھی چیز خریدتے وقت اُس کے معیار (کوالٹی) کو ضرور دیکھیں جیسے کہ اگر آپ کپڑے خریدنے کے خواہش مند ہیں تو معیار کو مدنظر ضرور رکھیں کیونکہ غیر معیاری چیز کم عرصے چلتی ہے اس کے برعکس کوالٹی پروڈکٹ کی معیاد زیادہ ہوتی ہے۔
غیر ضروری خوبصورتی پر توجہ نہ دیں
ایک اور عادت جس پر قابو پانا ضروری ہے وہ یہ ہے کہ آپ غیر ضروری خوبصورتی کے پیچھے نہ بھاگیں کیونکہ اس معاملے میں آپ ہزاروں روپے خرچ کر بیٹھتے ہیں، اگر آپ پہلے مہینے میں دو بار بیوٹی پارلر یا حجام کے پاس جاتے تھے تو اسے ایک بار کردیں اور اسی میں وہ کام کروائیں جو پورا مہینہ آسانی سے چل سکے۔
ان معمولی عادات کو اپنا کر آپ ماہانہ رقم کو محفوظ بناسکتے ہیں۔
