قاہرہ : مصر کی ایک باہمت 80 سالہ معمر خاتون نے ماسٹرز کی ڈگری حاصل کرلی اور اب پی ایچ ڈی کی تیاریوں میں مصروف ہیں۔
قاہرہ کے شہر منصورہ میں 80 سالہ مصری خاتون امال اسماعیل نے فنون کی فیکلٹی سے امتیازی نمبروں کے ساتھ ماسٹر کی ڈگری حاصل کی ہے۔
امال کے درجنوں پوتے پوتیوں نے جشن منایا اور یونیورسٹی میں امال کے مقالے پر بھی بحث کی، مصری بزرگ خاتون نے میڈیا کو بتایا کہ اس نے اپنی تعلیم جاری رکھنے کے لیے ایک طویل اور تلخ جدوجہد کی ہے۔
بزرگ خاتون نے "العربیہ ڈاٹ نیٹ” کو انٹرویو دیتے ہوئے اپنی زندگی کی مسلسل جدوجہد کے بارے میں آگاہ کیا کہ کس طرح انہوں نے آنے والے نشیب و فراز کا مقابلہ کیا۔
انہوں نے بتایا کہ بچپن میں ہی پرائمری سرٹیفکیٹ حاصل کرنے کے بعد میری تعلیم رک گئی تھی۔ اس کے بعد میں نے شادی کرلی اور اپنے بچوں کی پرورش میں مصروف ہوگئی۔
38سال کی عمر میں مجھے کینسر ہوگیا۔ اس سے ایک سال قبل میں نے تعلیم مکمل کرنے کا فیصلہ کیا تھا لیکن بیماری کی وجہ سے تعلیم پھر رک گئی۔
انہوں نے بتایا کہ میں نے ہمت نہیں ہاری اور علاج کے پہلے مرحلے کے دوران ہی ابتدائی تعلیم مکمل کرلی۔ اپنے بچوں کی پرورش میں مصروفیت کے حالات کی وجہ سے ایک مرتبہ پھر تعلیم کا سلسلہ رک گیا۔ 30 سال کے بعد اس کے شوہر کا انتقال ہو گیا اور میں تنہائی کی زندگی گزار نے لگی۔
اس لیے میں نے اپنا فارغ وقت اپنی تعلیم جاری رکھنے میں گزارنے کا فیصلہ کیا۔ امال نے مزید بتایا کہ جب میں 70 سال کی عمر کو پہنچی تو میں نے سیکنڈری اسکول میں داخلہ لیا اور دوران تعلیم بہت سی مشکلات کا سامنا کرنا پڑا۔
ان مشکلات میں دوسروں کی ناپسندیدہ نظر بھی شامل تھی لیکن میں نے اپنے ارادے کو مضبوط کیا۔ اپنے پوتے پوتیوں کی حوصلہ افزائی کے درمیان ہائی اسکول کی تعلیم مکمل کرلی۔
مصری بوڑھی خاتون نے اپنی بات جاری رکھتے ہوئے کہا اس کے بعد میں نے فیکلٹی آف آرٹس میں شمولیت اختیار کی اور بیچلر کی ڈگری حاصل کی، پھر میری توجہ اپنے سائنسی عزائم کو مکمل کرنے کی طرف چلی گئی تو میں نے فیکلٹی کے سوشیالوجی ڈیپارٹمنٹ میں ماسٹر کے مقالے کی تیاری کرنے کا فیصلہ کیا۔
تین سال کے اس تعلیمی سفر کے دوران میں نے اپنا مقالہ مکمل کرلیا۔ ماسٹرز کی تعلیم کے دوران مجھے صحت کے بحرانوں کا سامنا کرنا پڑا۔
