بعض افراد ڈپریشن اور ذہنی دباؤ کا شکار رہتے ہیں اور ناخوش رہنے کی شکایت کرتے ہیں۔ ان کا کسی بھی کام میں دل نہیں لگتا اور وہ بے رغبتی سے زندگی گزارتے ہیں۔ ماہرین کے مطابق کچھ طریقے ایسے ہیں جنہیں اپنا کر آپ اپنی بے رنگ زندگی کو بدل سکتے ہیں۔
اگر آپ بھی ایسے ہی افراد میں شامل ہیں تو مندرجہ ذیل طریقے اپنائیں۔
سب سے پہلے تو یہ بات جان لیں کہ ہر شخص کی خوشی کا خیال رکھنا ناممکن ہے۔ اگر آپ اپنے ارد گرد موجود تمام افراد کی خوشی کا خیال رکھیں گے تو آپ خود ناخوش رہیں گے۔ لہٰذا دوسروں کی خوشی کا خیال چھوڑ دیں۔
اپنی خوشی کا خود خیال کریں
کسی شخص کو اتنی اہمیت نہ دیں کہ وہ آپ کی خوشیوں پر اثر انداز ہوسکے۔ اپنی خوشیاں کسی کو برباد مت کرنے دیں۔
ناپسندیدہ لوگوں سے دور رہیں
ایسے افراد جو آپ کے لیے ذہنی پریشانی کا سبب بنتے ہیں انہیں اپنی زندگی سے خارج کردیں۔ یہ افراد آپ کی تخلیقی صلاحیتوں اور آپ کی خوشیوں کو کھا جائیں گے۔
نیند پوری کریں
نیند پوری کرنا خوشی کا ایک ذریعہ ہے۔ اگر آپ کی نیند پوری نہیں ہوگی تو آپ پریشان اور چڑچڑے پن کا شکار رہیں گے اور خوبصورت لمحات سے بھی لطف اندوز نہیں ہوسکیں گے۔
کچھ دیر تنہا رہیں
ہر وقت لوگوں میں گھرا رہنا بھی ٹھیک نہیں۔ کچھ وقت کے لیے خود کو تنہا چھوڑیں اور تنہائی اور خاموشی سے لطف اندوز ہوں۔
فطرت کے ساتھ وقت گزاریں
پھول، پودے، درخت، بارش، صبح کا وقت، ساحل سمندر، سردیوں کی دھوپ، یہ ایسی چیزیں ہیں جو آپ کے اندر ایک لطیف احساس کو جنم دیں گی اور ڈپریشن کو ختم کریں گی۔ لہٰذا کچھ وقت فطرت کے ساتھ ضرور گزاریں۔
جذبات کا اظہار کریں
ہم ذہنی طور پر انہی افراد سے قریب ہوتے ہیں جو ہمیں اور ہمارے جذبات کو سمجھتے ہیں۔ ایسے لوگوں سے گفتگو کریں اور انہیں بتائیں کہ آپ کیا محسوس کرتے ہیں۔
ایسے افراد جو آپ کو سمجھتے نہیں ان کے سامنے اپنے جذبات کا اظہار کرنا خود کو تکلیف میں ڈالنا ہے۔
پسندیدہ چیزوں کو سنیں
اگر آپ کو فلم دیکھنا یا کوئی گانا سننا پسند ہے تو اسے ضرور سنیں۔ یہ مت سوچیں کہ فلم دیکھنے یا گانے سننے سے وقت ضائع ہوگا۔
خود کو مسلط مت کریں
جس جگہ آپ فٹ نہیں وہاں زبردستی مسلط مت ہوں۔ اگر کسی جگہ جا کر یا کسی سے مل کر آپ کو خوشی نہیں ہوتی تو وہاں مت جائیں۔
اپنی خواہشات کو پورا کریں
اپنی چھوٹی چھوٹی خواہشوں کو دل میں دبا کر مت رکھیں انہیں پورا کریں۔ جیسے بارش میں نہانا، ڈانس کرنا، یا کسی خاص شخص سے بات کرنا۔ خواہشات کو دبا کر رکھنا انسان میں ناخوشی کا احساس پیدا کرتا ہے۔
ان طریقوں کو اپنا کر آپ اپنی زندگی کو بامقصد بنا سکتے ہیں اور صحیح معنوں میں زندگی کا لطف اٹھا سکتے ہیں۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
