کراچی: پاکستان کو روڈ ٹو مکہ منصوبہ میں شامل کرنے سے متعلق اہم پیش رفت سامنے آگئی ، منصوبہ کے تحت رواں سال 90 فیصد پاکستانی عازمین حج کی امیگریشن پاکستان میں ہوگی، اس سلسلے میں 14 رکنی اعلیٰ سطحی سعودی وفد یکم اپریل کو پاکستان پہنچے گا۔
تفصیلات کے مطابق پاکستانی عازمین حج کے لئے بڑی خوشخبری آگئی، وزیراعظم عمران خان اور سعودی ولی عہد کے درمیان مذاکرات رنگ لے آئے ہیں، پاکستان کو روڈ ٹو مکہ منصوبہ میں شامل کرنے سے متعلق اہم پیش رفت ہوئی ، منصوبہ کے تحت رواں سال 90 فیصد پاکستانی عازمین حج کی امیگریشن پاکستان میں ہو گی۔
عازمین کو پہلے مر حلے میں اسلام آباد اور کراچی ایئر پورٹ پر ہی پری کلرینس کردی جائے گی، کراچی اور اسلام آباد ایئرپورٹ پر سعودی امیگریشن کا عملہ عازمین کو دستاویزات دیکھ کر کلیرکرے گا۔
سعودی عرب اور پاکستان کے درمیان روڈ ٹو مکہ منصوبہ کو قابل عمل بنانے پر مشاورت ہوگی ، اس سلسلے میں 14 رکنی اعلیٰ سطحی سعودی وفد یکم اپریل کو پاکستان پہنچے گا، سعودی وفد ڈی جی پاسپورٹ سعودی عرب کی سربراہی میں پاکستان پہنچے گا۔
سعودی وفد کی وزارت مذہبی امور، وزارت خارجہ، داخلہ، ایوی ایشن ڈویژن معاونت کریں گے، وفد چار پاکستانی ائیر پورٹس کا دورہ کرے گا اور اسلام آباد، لاہور، پشاور، کراچی ائیرپورٹس پر سہولیات کا جائزہ لے گا۔
مزید پڑھیں : سرکاری حج اسکیم قرعہ اندازی: ایک لاکھ 7 ہزار سے زائد خوش نصیبوں کے ناموں کا اعلان
خیال رہے روڈ ٹو مکہ منصوبہ میں پاکستان کو شامل کرنے کا پہلے اعلان ہوچکاہے۔
یاد رہے چند روز قبل حکومت نے سرکاری اسکیم کے تحت حج قرعہ اندازی کر کے حج پر جانے والے ایک لاکھ 7 ہزار سے زائد خوش نصیبوں کے ناموں کا اعلان کیا تھا۔
وزیرِ مذہبی امور کا کہنا تھا کہ حکومت کا سب سے بڑا انقلابی اقدام روڈ ٹو مکہ ہے، اس کا سعودی ولی عہد نے دورہ پاکستان میں وزیر اعظم کے مطالبے پر اعلان کیا، وزیر اعظم کی درخواست پر پاکستانی عازمین کو روڈ ٹو مکہ پروجیکٹ میں شامل کیا گیا ہے۔
