لاہور: آج 9 محرم الحرام کو پنجاب میں 1 لاکھ سے زائد پولیس اہلکار سیکیورٹی پر تعینات کیے گئے ہیں۔
تفصیلات کے مطابق 9 محرم الحرام کے موقع پر لاہور سمیت پنجاب بھر میں سکیورٹی ہائی الرٹ ہے، پنجاب پولیس کا کہنا ہے کہ آج 1689 عزاداری جلوس اور 3895 مجالس کا انعقاد ہو رہا ہے۔
لاہور سمیت پنجاب بھر میں ایک لاکھ سے زائد پولیس اہلکار ڈیوٹی دے رہے ہیں، پولیس ترجمان کے مطابق لاہور میں 10 ہزار سے زائد پولیس افسران و اہلکار سیکیورٹی ڈیوٹی پر موجود ہیں۔
9 اور 10 محرم کو طوفانی بارشوں کی پیش گوئی
آئی جی پنجاب ڈاکٹر عثمان انور نے بتایا کہ دفعہ 144 پر سختی سے عمل درآمد کرایا جا رہا ہے، 30 ہزار کمیونٹی رضا کار سیکیورٹی میں پولیس کی معاونت کر رہے ہیں، انھوں نے تمام مسالک سے اپیل کی ہے کہ امن، رواداری اور افہام و تفہیم کو فروغ دیں۔
آئی جی پنجاب کا کہنا تھا کہ کوڈ آف کنڈکٹ کے تحت جلوسوں کے روٹس، اوقات، اور لاؤڈ اسپیکر ایکٹ پر عمل لازم ہے، انھوں نے یہ بھی کہا کہ ملک دشمن عناصر پر بھی کڑی نظر رکھی جا رہی ہے۔
