(تصاویر : پیار علی امیر علی)
کراچی: ملی سربلندی کے جذبے سےسرشار اے آر وائی فلمز اور فٹ پرنٹ کی مشترکہ پیشکش فلم’شاہ‘ نے ریلیز ہوتے ہی دھوم مچادی۔
فلم شاہ فٹ پاتھ پررہنے والے ایک بچے کی کہانی ہے جس نے باکسنگ کی دنیا میں پاکستان کا نام رروش کردیا۔
باکسرحسین شاہ پاکستان کے ایک گمنام سابق اولمپئین ہیں جو کہ 1988 کےاولمپک میں جنوبی ایشیا سے باکسنگ میں کانسی کا تمغہ جیتنے والے پہلے کھلاڑی تھے۔
کراچی کے علاقے لیاری کے باکسنگ رنگز اور احاطوں میں شوٹ ہونے والی فلم ’شاہ‘اس محنت کی یاد دلاتی ہے کہ کس طرح وسائل سے محروم بچہ پاکستان کا ایک قومی ہیرو بن کر ابھرا۔
اے آروائی فلمز نے پاکستان کے 69 ویں جشنِ آزادی پر’ شاہ‘ کا منفرد تحفہ دیا ہے، فلم نے اگست کو اپنے پریمئر میں ہی دھوم مچادی ہے
فلم کے مصنف اور ہدایت کار عدنان سرور اپنی فلم میں ’حسین شاہ‘ کا مرکزی کردار نبھا رہے ہیں۔
ان کا کہنا تھا کہ’’مجھے 1988 میں ہونے والی حسین شاہ کی تاریخی فائٹ یاد ہے، میں اس وقت بہت چھوٹا تھا۔ حسین شاہ کی جیت نے انہیں راتوں رات قومی ہیرو بنادیا حالانکہ قوم بعد میں انہیں بھول گئی لیکن میں نے انہیں یاد رکھا‘‘۔
