لندن: لیبرپارٹی نے ایک بس ڈرائیور کے بیٹے اورسابق حکومتی وزیرصادق خان کو میئر کے انتخابات کے لئے منتخب کرلیا ہے یعنی پہلی بار کوئی مسلمان ممکنہ طورپرلندن کا میئربننے جارہا ہے۔
صادق خان ایک سابق انسانی حقوق کے وکیل ہیں اور مئی میں ہونے والے والے میئر کے انتخابات میں حصہ لے رہے ہیں ، اس وقت قدامت پسند بورس جانسن لندن کے میئرہیں۔
لندن کا میئر دنیا کے دیگر ترقی یافتہ شہروں جیسےنیویارک کے مقابلے انتہائی کم اختیارات کا حامل ہوتا ہے لیکن یہ ایک ایسا عہدہ ہے جو کہ اپنے اندر اہم شخصیا ت کے لئے ہمیشہ کشش رکھتا ہے۔
I am deeply humbled that so many Londoners have put their faith in me today. Together, we can change London. pic.twitter.com/COQpcJrU55
— Sadiq Khan MP (@SadiqKhan) September 11, 2015
چوالیس سالہ صادق خان کا کہنا ہے کہ وہ چاہتے ہیں کہ لندن جو کہ بیک وقت دنیا کے امیر ترین اور برطانیہ کے غریب ترین لوگوں کاگھرہے وہاں مساوات کو فروغ دیا جائے۔
میئرکے انتخابات کے لئے نامزد ہونے کے بعد صحافیوں سے گفتگو کرتے کہا کہ وہ چاہتے ہیں کہ لندن کے تمام شہریوں کو یکساں مواقع میسرہوں۔
ان کا کہنا تھا کہ وہ لندن کو ایک ایسا شہر بنانا چاہتے ہیں جہاں ہرشخص کو اس کی صلاحیتوں کے مطابق کام کے مواقع ملیں۔