اسلام آباد: ترجمان دفتر خارجہ نے واضح کیا ہے کہ داعش کا پاکستان میں کوئی وجود نہیں جبکہ افغانستان میں داعش کی موجودگی پر کوئی تبصرہ نہیں کرسکتے۔

ترجمان قاضی خلیل اللہ نے ہفتہ وار نیوز بریفنگ کے دوران کہا کہ پاکستان افغانستان اور طالبان کے مذاکرت کی حمایت کرتا ہے، امید ہے کہ تمام طالبان گروپ مذاکرتی عمل کا حصہ بنیں گے،  سرتاج عزیز کے دورۂ کابل کے دوران ملاقاتیں مفید رہی ہیں، وہ خصوصی پیغام لے کر کابل گئے تھے، افغانستان پاکستان کا پڑوسی ملک ہے، پاکستان افغانستان میں امن چاہتا ہے۔

انہوں نے کہا کہ پاکستان اور امریکہ کے تعلقات مضبوط ہیں، ترجمان نے مزید کہا کہ بھارت سرحد پر جنگ بندی معاہدے کی خلاف ورزی کر رہا ہے، اسے معاہدے کی پاسداری کرنی چاہیے۔

ایک سوال پر انہوں نے بتایا کہ ۔جنر ل اسمبلی میں وزیرِاعظم کی تقریر کو حتمی شکل دی جارہی ہے، وزیرِاعظم 30 ستمبر کو جنرل اسمبلی سے خطاب کر یں گے، پاکستان نیوکلئرسپلائزز گروپ کا حصہ بننا چاہتا ہے کیونکہ اسکی اہلیت رکھتا ہے۔

انہوں نے بتایا کہ روم میں حادثہ کا شکار ہونے والی کشتی کی بارے میں معلومات لی جارہی ہیں، ایک سوال کے جواب میں ترجمان دفتر خارجہ کا کہنا تھا کہ پاکستان کا کنٹرول سسٹم محفوظ اور مضبوط ہے۔