لاہور: احتساب عدالت نے پیپلز پارٹی کے رہنما قاسم ضیاء کے جوڈیشل ریمانڈ میں پانچ اکتوبر تک توسیع کردی۔
تفصیلات کے مطابق فراڈ کیس کے ملزم پیپلز پارٹی کے رہنما قاسم ضیاء کو سات روزہ جوڈیشل ریمانڈ کے بعد آج احتساب عدالت میں پیش کیا گیا۔
نیب کی جانب سے موقف اختیار کیا گیا کہ قاسم ضیاء کی ضمانت اور پلی بارگین کے حوالے سے معاملہ لاہور ہائیکورٹ میں ہے جس کا فیصلہ آنے تک قاسم ضیاء کے جوڈیشل ریمانڈ میں توسیع کی جائے۔ ؎
عدالت نے نیب کی درخواست پر قاسم ضیاء کے جوڈیشل ریمانڈ میں پانچ اکتوبر تک توسیع کردی۔ واضح رہے کہ نیب پنجاب نے ایک ماہ قبل کروڑوں روپے فراڈ کے الزام میں پیپلز پارٹی پنجاب کے سابق صدر قاسم ضیاء کو گرفتار کیاتھا۔
نیب پنجاب کے مطابق قاسم ضیاء کی کمپنی علی عثمان سکیورٹیز پر عوام سے کروڑوں روپے فراڈ کا الزام تھا، جس پر انہیں ان کی رہائش گاہ سے گرفتار کیا گیا۔
قاسم ضیاء پر اسٹاک ایکسچینج میں کروڑوں روپے کے گھپلے کا الزام ہے۔ قاسم ضیاء ہاکی فیڈریشن کے سابق صدر اور پنجاب اسمبلی میں اپوزیشن لیڈر بھی رہ چکے ہیں۔
