لاہور: لاہور ہائیکورٹ نے الطاف حسین پابندی کیس میں عدالتی حکم کے باوجود میڈیا پر الطاف حسین کی خبریں اور بیانات شائع ہونے پر چیئرمین پیمرا کو طلب کرلیا.
جسٹس مظاہر علی اکبر نقوی کی سربراہی میں تین رکنی بنچ نے کیس کی سماعت کی الطاف حسین کی، وکیل عاصمہ جہانگیر سپریم کورٹ میں مصوروفیت کے باعث عدالت میں پیش نہ ہوسکی۔
درخواست گزار کے وکلاء نے دلائل دیے کہ الطاف حسین نے جو بیان حلفی جمع کرایا وہ جعلی ہے اور بیان حلفی میں گزشتہ بیانات پر معافی مانگی گئی اور نہ ہی آئندہ اجتناب برتنے کا حلف لیا عدالت نے الطاف حسین کے بیانات اور خبروں پر پابندی عائد کررکھی ہے مگر اس کے باوجود یہ شائع ہورہی ہے جو توہین عدالت ہے.
عدالت نےسماعت 16 اکتوبر تک ملتوی کرتے ہوئے چیئرمین پیمرا کو وضاحت کے لیے طلب کرلیا.
ہائیکورٹ کے فل بنچ کے روبر الطاف حسین اور ایم کیو ایم کے دیگر رہنماؤں کے خلاف غداری کا مقدمہ درج کرنے کے لیے درخواستیں زیر سماعت ہیں جن پر عدالت نے الطاف حسین کے بیانات اور خبریں میڈیا پر نشر کرنے پر پابندی عائد کررکھی ہے.
یاد رہے کہ لاہور ہائی کورٹ نے ایم کیو ایم کے قائد الطاف حسین کی تقاریر کی لائیو کوریج پر تاحکم ثانی پابندی عائد کردی تھی.
واضح رہے کہ رواں برس جولائی میں قائد الطاف حسین نے اپنے ایک خطاب میں ہندوستان کی خفیہ ایجنسی ‘را’ سے مدد کرنے کی بات کی تھی جبکہ انھوں نے پاک فوج پر بھی تنقید کی تھی۔
