کراچی: ورلڈ وائلڈ لائف پاکستان اور سندھ وائلڈ لائف ڈیپارٹمنٹ کی مشترکہ ٹیم نے نایاب نسل کے 62 کچھوے بچالئے۔
تفصیلات کے مطابق نایاب نسل کے کچھوے کراچی کے علاقے کورنگی انڈسٹریل ایریا میں واقع ای بی ایم کاژوے سےبرآمد کئے گئے۔
وائلڈ لائف ڈیپارٹمنٹ کےمطابق 62 کچھوے زندہ پکڑے گئے جبکہ 25 مردہ حالت میں پائے گئے جو کہ ممکنہ طور پر گاڑیوں کے نیچے آکر کچلے گئے تھے۔
کچھووں کو کیرتھر نیشنل پارک میں واقع حب ڈیم مین میں چھوڑدیا گیا ہے۔
وائلڈ لائف ذرائع کا کہنا ہے کہ مذکورہ نسل کے نایاب کچھوے کراچی میں نہیں پائے جاتے اور یقینی طور پر نایاب جانوروں کی اسمگلنگ کرنے والوں نے سندھ وائلڈ لائف ڈیپارٹمنٹ کی سخت نگرانی سے عاجز آکر رات کے اندھیرے میں انہیں یہاں چھوڑدیا۔
برآمد کئے گئے کچھووں میں نایاب نسل کے افغان کچھوے اور بلیک پونڈ کچھوے شامل ہیں۔
کچھوے جس جگہ سے پکڑے گئے ہیں وہاں سے کچھوے رکھنے کے لئے جوٹ کے بنے ہوئے تھیلے بھی ملے ہیں۔
