گوجرانوالہ: بلا وجہ چالان کرنے سے دلبرداشتہ ہو کر محنت کش نے جی ٹی روڈ پر اپنے چنگ چی رکشے کو آگ لگا دی، ریسکیوٹیموں نے موقع پر پہنچ کر آگ پر قابو پالیا۔
تفصیلات کے مطابق گوجرانوالہ میں بلا وجہ چالان کرنے سے دلبرداشتہ ہو کر محنت کش عرفان نے اپنے چنگ چی رکشے کو آگ لگا لی جس سے چنگ چی بری طرح جھلس گیا۔
واقعے کے بعد ریسکیو1122کی ٹیمیں موقع پر پہنچ گئیں اور آگ پر قابو پالیا۔
چنگ چی مالک عرفان کے مطابق وہ سارا دن محنت مزدوری کرکے اپنے بچوں کا پیٹ پالتا ہے لیکن ٹریفک وارڈن نے اس کا بلا وجہ چالان کیا۔
اس نے بتایا کہ اس نے ٹریفک وارڈن کی منت سماجت کی لیکن اس نے اس کا 500 روپے کا چالان کردیا جس سے دلبرداشتہ ہو کر اس نے اپنی چنگ چی کو آگ لگا لی۔
تھانہ کوتوالی پولیس نے موقع پر پہنچ کر واقعہ کی تحقیقات شروع کردی ہیں
