دنیا بھرمیں یوم عاشور عقیدت و احترام سے منایا گیا

کربلا / تہران / مناما / بیروت : دنیا بھرمیں یوم عاشور عقیدت و احترام سے منایا گیا، ایران اور عراق کی طرح یورپ اور امریکہ میں بھی عاشورہ عقیدت و احترام سے منایا گیا۔

کربلا میں روضہ امام حسین رضی اللہ تعالیٰ پر لاکھوں افراد کا اجتماع ہوا ،لاکھوں کی تعداد میں امام حسین عالی مقام کے زائرین کربلائے معلی پہنچ گئے۔

دنیا بھر سے آئے زائرین نے مزار پر حاضری دی ،عزاداروں نے ماتم اور نوحہ خوانی کرکے امام حسین رضی اللہ تعالیٰ عنہ کو خراج عقیدت پیش کیا۔

اس موقع پر سیکورٹی کے کڑے انتظامات کئے گئے تھے، ایران کے دارالحکومت تہران میں یوم عاشور کا مرکزی اجتماع ہوا جس میں ہزاروں افراد شریک تھے ۔

عزاداروں نےزنجیرزنی اور نوحہ خوانی کی۔بحرین کے دارالحکومت مناما میں ہزاروں افراد نے یوم عاشور کے جلو س میں شرکت کی۔

شرکا نے تلواروں کا ماتم کیا ،جلوس میں بچے بھی بڑی تعداد میں موجود تھے۔ اس موقع پرجگہ جگہ شہدائے کربلا کی یاد میں پانی، شربت اور چائے کی سبیلیں لگائی گئیں تھیں جبکہ عزاداروں میں نیاز بھی تقسیم کی جاتی رہی۔

لبنان میں بھی یوم عاشور عقیدت و احترام سے منایا گیا ،ہزاروں افراد کے اجتماع سے حزب اللہ کے سربراہ حسن نصرا للہ نے خطاب کیا۔