اسلام آباد: چین نے زلزلہ متاثرین کے لئے ایک لاکھ امریکی ڈالر کی امداد حکومت پاکستان کے حوالے کر دی۔
اسلام آباد میں چین کے سفیر سن وین ڈانگ نے پاکستان ریڈ کریسنٹ کے مرکزی آفس کے دورے کے موقع پر امدادی رقم کا چیک چیئر مین پاکستان ہلال احمر ڈاکٹر سعید الہی کے حوالے کیا ۔
اس موقع پر گفتگو میں چینی سفیر کا کہنا تھا کہ چینی قوم اور حکومت زلزلے سے متاثرہ پاکستانی بھائیوں کے دکھ درد کو پوری طرح محسوس کرتی ہے، چینی حکومت اور عوام مشکل اور ضرورت کی اس گھڑی میں پاکستانی قوم کے ساتھ کھڑی ہے۔
چینی سفیر سن وین ڈانگ نے زلزلہ متاثرین کی بحالی اور امداد کے لئے چین کی جانب سے بھر پور تعاون کا یقین دلایا، چیئرمین ہلال احمر پاکستان ڈاکٹر سعید الہی نے متاثرین کے لئے امداد کی فراہمی پر چینی حکومت اور عوام کا شکریہ ادا کرتے ہوئے اس امید کا اظہار کیا کہ چینی امداد متاثرین کی بحالی میں اہم کردار ادا کرے گی۔
انکا کہنا تھا کہ ریڈ کریسنٹ کی جانب سے زلزلہ سے متاثرہ علاقوں میں ریسکیو آپریشن بھر پور انداز میں جاری ہے،خیبر پختونخوا ، فاٹا اور گلگت بلتستان میں دو ہزار سے زائد خاندانوں کو شیلٹرز، طب اور نان فوڈ آئٹم کی مد میں امداد فراہم کی جا چکی ہیں ۔
پاکستان ہلال احمر انٹر نیشنل فیڈریشن آف ریڈ کریسنٹ سمیت دیگر عالمی اداروں کے ساتھ مل کر شانگلہ ، طور غر اور چترال میں متاثرین کوشیلٹرز، نان فوڈ آئٹم سمیت طبی سہولیات فراہم کر رہی ہے ۔
