اسلام آباد: پاکستان تحریک انصاف کے سربراہ عمران خان کی ترجمان ڈاکٹرشیریں مزاری کا کہنا ہے کہ عمران خان کے خلاف ریحام خان سے منسوب تمام کہانیاں جھوٹ پر مبنی اور شاطراذہان کی پیداوارہیں۔
اپنے بیان میں ڈاکٹر مزاری نے افسوس کا اظہار کرتے ہوئے کہا کہ میڈیا میں عمران خان اورریحام خان کی شادی کے اختتام پر افواہوں کو زیادہ اہمیت دی جارہی ہے۔
انہوں نے عمران خان کی جانب سے بیان جاری کرتے ہوئے یہ بھی کہا کہ ’’ ریحام خان کے ساتھ پیسوں کی سیٹلمنٹ کی خبریں بے بنیاد ہیں اور جان بوجھ کر عمران خان اور ریحام خان کو نشانہ بنانے کے لئے پھیلائیں جارہی ہیں۔
انہوں نے یہ بھی کہا کہ کسی بھی پارٹی لیڈرسے عمران خان نے شادی یا طلاق کے لئے مشاورت نہیں کی تھی اور پارٹی لیڈران کو طلاق کا سبب قراردینا بے بنیاد ہے۔
ان کا یہ بھی کہنا تھا کہ پارٹی کی قیادت عمران خان کے ذاتی معاملات میں دخل اندازی نہیں کرتی اور آئندہ بھی نہیں کرےگی۔
انہوں نے اس امر پر افسوس کا اظہار کیا کہ میڈیا پر افواہوں کی رپورٹنگ سے نہ صرف عمران خان اور ریحام خان کو تکلیف پہنچ رہی ہے بلکہ ان کے اہل خانہ بالخصوص ان کے بچے بھی ان تمام معاملات کے سبب بے پناہ پریشانی کا شکار ہیں۔
