عمر کوٹ : تحریک انصاف کے چئیرمین عمران خان نے کہا ہے کہ بلاول بھٹو زرداری لیڈر بننےکیلئے میری شاگردی میں آجائیں، انہوں نے کہا کہ سندھ کے لوگ سب سے زیادہ تبدیلی چاہتے ہیں، قومی اسمبلی میں ہندومیرج بل لانےکی کوشش کررہے ہیں۔
ان خیالات کا اظہار عمران خان نے عمر کوٹ میں جلسہ عام سے خطاب کرتے ہوئے کیا، کپتان نےسندھ میں پیپلزپارٹی کے خلاف نیا محاذ کھول دیا، چیئر مین پی ٹی آئی نے اپنے خطاب میں بلاول بھٹو زرداری کو مخاطب کرتے ہوئے کہا کہ ’بلاول بیٹے ایسی تقریر نہ کرو، آپ کی قابلیت کیا ہے؟ کاغذ پر لکھ کر دینے سے لوگ لیڈر نہیں بن جاتے، بلاول بیٹے میرے پاس آﺅ آپ کو لیڈر بننا سیکھاﺅں گا‘۔
انہوں نے کہا کہ سندھ کے لوگوں کو ان کے حقوق سے محروم رکھا جا رہا ہے، سندھ کے عوام کیڑے نہیں اقبال کے شاہین بنیں۔
ان کا کہنا تھا کہ وڈیرے مقامی لوگوں کو بلدیاتی انتخابات میں حصہ لینے پر خوفزدہ کریں گے لیکن سندھ کے عوام کو اپنے حقوق کیلئے کھڑا ہونا پڑے گا۔
چیئرمین تحریک انصاف کا کہنا تھا کہ ہرشخص کے اندر خوف ہوتا ہے، میرے اندر بھی خوف تھا لیکن میں نے اسے ختم کیا اور زندگی میں بہت اونچ نیچ دیکھی جب کہ 2 بار گرچکا ہوں اس لئے اب گرنے کا خوف نہیں اور اب ہار بھی مجھے نہیں ہرا سکتی،عمران کے پاس اربوں ڈالرنہیں صرف ایک بڑا خواب ہے۔
عمران خان نے کہا کہ سندھ کے لوگوں کیلئے نیا راستہ نکالنے جا رہا ہوں کیونکہ ظلم ختم کرناہے، اگر ایسا ہی ہوتا رہا تو آپ کے بچے غلامی کریں گے۔
انہوں نے کل کے جلسے پر مبارکباد دیتے ہوئے کہا کہ کارکنوں کی جدوجہد اور جذبہ نظر آیا ہے۔ ان کا کہنا تھا کہ ظالم لوگ شفاف انتخاب نہیں ہونے دیں گے اور کرسی نہیں چھوڑ سکتے کیونکہ کرسی میں پیسہ ہے۔
