کراچی : حکومت سندھ کے تحت بنائی گئی جےآئی ٹی میں ڈاکٹر عاصم کے القاعدہ سےتعلقات کاانکشاف کیا گیا ہے، رپورٹ کے مطابق ڈاکٹر عاصم کے اسپتال میں القاعدہ اور لیاری گینگ وار کے ملزمان کا بھی علاج ہوا۔
تفصیلات کے مطابق سندھ حکومت کے تحت بنائی گئی جے آئی ٹی کے مطابق پیپلز پارٹی کے رہنما و سابق مشیر پیٹرولیم و قدرتی وسائل ڈاکٹر عاصم نے القاعدہ کے ساتھ روابط کا اعتراف کر لیا ہے۔
نوّے روز کیلئےرینجرز کی تحویل جی آئی ٹی کی ٹیم کے سامنے تفتیش کے دوران ڈاکٹر عاصم حسین نےسارے راز اگل دیئے۔
ڈاکٹر عاصم حسین نے دوران انو یسٹی گیشن بتا یا کہ ان کے دو نجی اسپتالوں میں لیاری گینگ وار اور ٹارگٹ کلرز کو طبی سہولیات فراہم کی گئیں جس کے بعد رینجرز اور دیگر قانون نافذ کرنے والے اداروں نے دہشت گردوں کو طبی سہولیات فراہم کرنے کا ریکارڈ بھی حاصل کرلیا۔
ذرائع کا یہ بھی کہنا ہے کہ اس حوالے سے رینجرز نے چالان تیار کرلیا ہے جسے جلد عدالت میں پیش کیا جائے گا اس کے علا وہ ڈاکٹر عاصم کیخلاف نیب سندھ نے کرپشن کے درجنوں مقدمات کی تحقیقات اور چالان بھی تیار کرلیاہے۔
بتا یا جا رہا ہے کہ ڈاکٹر عاصم کے نوے روز مکمل ہونے کے بعد نیب حوالگی کی درخواست عدالت میں دی جا ئے گی۔
ذرائع کے مطابق ڈاکٹر عاصم نے دوران تفتیش اہم شخصیات کے حوالے سے بھی انکشافات کئے ہیں ۔ ڈاکٹر عاصم کے انکشافات کے بعد تحقیقات کا دائرہ اہم لوگوں تک پھیلانے کا فیصلہ کیا گیا ہے۔
حکومت سندھ کی قائم کردہ جے آئی ٹی میں پولیس ،رینجرز اور حساس اداروں کے نمائندے شامل تھے۔
ذرائع کا کہنا ہے کہ ڈاکٹر عاصم کی 90روزہ تحویل 25نومبر کو ختم ہو رہی ہے لیکن انہیں رہا کرنے کےامکانات نظر نہیں آرہے ۔
Dr Asim has illegal links with Al-Qaeda… by arynews
