لاہور: فیصل آباد سمیت پنجاب کے مختلف علاقوں میں شدید دھند کے باعث ٹریفک حادثات میں ایک شخص جاں بحق اور متعدد زخمی ہوگئے.
پنجاب کے بیشتر شہروں میں صبح سویرے دھند کا راج رہا، فیصل آباد کے علاقے شریں والا میں دھند کے باعث کرین اور سات بسیں آپس میں ٹکرا گئیں، جس کے نتیجے میں متعدد افراد زخمی ہوگئے، فیصل آباد کے نواحی علاقوں میں شدیددھند ،حد نگاہ صفر ہوگئی تھی۔
فیصل آباد کے چک جھمرہ میں دھند کے باعث ٹرک نے موٹر سائیکل کو روند ڈالا، جس کے نتیجے میں موٹر سائیکل سوار دودھ فروش جاں بحق ہوگیا۔
شیخوپورہ میں سیائیاں والا کے قریب دھند کے باعث کئی گاڑیاں آپس میں ٹکرا گئیں جبکہ دھند کے باعث ایم تھری پنڈی بھٹیاں سے فیصل آباد کیلئے بند کردیا گیا تھا۔
اوکاڑہ اور گردو نواح میں شدید دھند ، جی ٹی روڈ پر ٹریفک سست روی کا شکار رہی، عار فوالا اور گردونواح میں بھی سردی کی شدت کے ساتھ شدید دھند کا راج رہا ڈسکہ اور حویلی لکھا کے گردونواح کے علاقے بھی شدید دھند کی لپیٹ میں رہے، جس کی وجہ سے ٹریفک کی روانی میں مشکلات کا سامنا رہا.