نئی دہلی : بھارت کے وزیر داخلہ راج ناتھ سنگھ نے کہا ہے کہ پاکستان نے پٹھان کوٹ پر حملے میں ملوث افراد کے خلاف کارروائی کیلئے اقدامات کئے ہیں۔
یہ بات انہوں نے نئی دہلی میں میڈیا سے گفتگو کرتے ہوئے کہی، بھارتی وزیرِ داخلہ کاکہنا تھا کہ دونوں ممالک کے خارجہ سیکریٹریوں کے درمیان مجوزہ مذاکرات ہوں گے یا نہیں۔ اس بارے میں مناسب وقت پر فیصلہ کیا جائے گا۔
راج ناتھ سنگھ نے کہا کہ پاکستان نے کچھ قدم اٹھائے ہیں، اس لئے سب کو انتظار کرنا چاہئیے۔ میں سمجھتا ہوں کہ اس کا یقین نہ کرنے کی فی الحال کوئی وجہ نہیں ہے۔
بھارتی میڈیا کے برعکس بھارتی وزیرداخلہ پاک بھارت مذاکرات کیلئے پرامید ہیں۔
واضح رہے کہ پاکستان اور بھارت کے خارجہ سیکریٹریوں کے درمیان 15 جنوری کو مذاکرات ہونے ہیں لیکن بھارتی حکومت یہ اعلان کر چکی ہے کہ پٹھان کوٹ پر حملے میں ملوث افراد کے خلاف ٹھوس کارروائی ہونے کی صورتمیں ہی یہ بات چیت ہو گی۔