مردان : محکمہ ایکسائز کے دفتر پر خودکش دھماکے کا مقدمہ درج کرلیا گیا۔ ایف آئی ار کی کاپی اے آر وائی نیوز نے حاصل کرلی۔ واقعے کی تحقیقات شروع کردی گئی ہے۔
تفصیلات کے مطابق مردان میں ایکسائز کے دفتر میں خود کش دھماکے کا مقدمہ درج کر لیا گیا۔ ایف آئی آر کی کاپی اے آر وائی نیوز نے حاصل کرلی۔
مقدمہ ایس ایچ او کی مدعیت میں درج کیا گیا ہے۔ ایف آئی آر میں دہشت گردی ،قتل اور اقدام قتل کی دفعات شامل ہیں، ایف آئی آر کے مطابق خودکش حملہ آور نے گیارہ بجکر بیالیس منٹ پر حملہ کیا۔حملے کے وقت وہاں چاراہلکارموجود تھے۔
حملہ آور کی عمر اٹھارہ سے بیس سال اور قد پانچ سے چھ فٹ تھا۔ تحقیقاتی اداروں نے دھماکے کی جگہ سے حملہ آور کے اعضاء حاصل کرلئے ۔
ابتدائی تفتیشی رپورٹ کے مطابق حملہ آور نے ٹیکس پراپرٹی یونٹ میں خود کو دھماکے سے اڑایا ، تفتیشی رپورٹ میں بتایا گیا ہے کہ حملہ آور نے خود کو اڑانےسے پہلے نائن ایم ایم پستول سے فائرنگ بھی کی تھی۔
سی سی ٹی وی فوٹیج سے حاصل کی گئی تصاویر مختلف تحقیقاتی ایجنسیوں کو بھیجی جائیں گی۔
