کراچی : وزیر اعلیٰ ہاؤس کے باہر پانی کی قلت کے خلاف احتجاج کرنے پر ایم کیو ایم رہنماؤں کے خلاف سرکارکی مدعیت میں مقدمہ درج کرلیا گیا۔
تفصیلات کے مطابق شہر قائد میں پانی بندش کے خلاف تین روز قبل ایم کیو ایم کی جانب سے وزیر اعلیٰ ہاؤس کے باہر دیئے جانے والے احتجاجی دھرنے کے خلاف تھانہ سول لائن میں سرکار کی مدعیت میں درج کرلیا گیا ہے۔
مقدمے میں ایم کیو ایم کے رہنماؤں ڈاکٹر فاروق ستار، خالد مقبول صدیقی، خواجہ اظہار الحسن، خوش بخت شجاعت، امین الحق سمیت دیگر اراکینِ رابطہ کمیٹی کو نامزد کیا گیا ہے۔
ایف آئی آر میں لاؤڈ اسپیکر ایکٹ، ریڈ زون کی خلاف ورزی اور ہنگامہ آرائی سمیت دیگر دفعات کو شامل کیا گیا ہے۔
مزید پڑھیں : سندھ حکومت سے مذاکرات کامیاب، متحدہ کا دھرنا ختم
واضح رہے کہ 5 جون کو متحدہ قومی موومنٹ کی جانب سے کراچی میں پانی کی قلت کے خلاف وزیر اعلیٰ ہاؤس کے باہر احتجاجی مظاہرہ کیا گیا تھا، جس کے بعد سندھ حکومت کی جانب سے تین رکنی وفد نے ایم کیو ایم سے مذاکرات کر کے ایک ہفتے میں شہر بھر میں پانی کی فراہمی کی یقین دہانی کروائی گئی تھی۔
مذاکرات کی کامیابی کے بعد ایم کیو ایم نے دھرنا ختم کرنے کا اعلان کرتے ہوئے سندھ حکومت کو پانی کے مسئلے کے حل کے لیے ایک ہفتے کا وقت دیا تھا۔
