سینٹ کٹس : سہ ملکی سیریز کے پانچویں میچ میں ویسٹ انڈیز نے آسٹریلیا کو چار وکٹوں سے شکست دے دی۔۔
سینٹ کٹس میں کھیلے جانے والے میچ کا ٹاس ویسٹ انڈیز نے جیت کر پہلے فیلڈنگ کا فیصلہ کیا۔
کھیل کے آغازمیں ہی آسٹریلیا کو پہلا دھچکا لگ گیا۔ عثمان خواجہ اور اسمتھ نے محتاط انداز سے کھیلتے ہوئے دوسری وکٹ کے لئے ایک سو اکہتر رنز کی شراکت قائم کی۔
عثمان خواجہ نروس نائنٹیز کا شکار ہوئے۔ وہ اٹھانوے رنزبناکر رن آؤٹ ہوگئے اور بدقسمتی سے محض 2 رنز کی کمی کے ساتھ سنچری مکمل کرنے میں ناکام رہے۔
دیگر بلے بازوں میں جارج بیلی نے 25، مچل مارش 16، ٹریوس ہیڈ1، میتھیو ویڈ 5، جیمز فالکنر 4، اور نتھن کولٹر نیل 1 اسکور بنانے میں کامیاب ہو سکے۔
اسمتھ نے چوہتر رنزبنائے۔ آسٹریلیا نے مقررہ اوورز میں سات وکٹوں پر دو سو پینسٹھ رنزبنائے۔ جواب میں ویسٹ انڈیز نے ابتدا سے ہی جارحانہ کھیل پیش کیا اور سیمیولز کی شاندار بیٹنگ کی بدولت ہدف چھیالیسویں اوور میں چھ وکٹوں پر حاصل کرلیا۔
ویسٹ انڈیز کی جانب سے جانسن چارلز نے 48، اینڈرے فلیچر 27 رنز، ڈوین براوو39، دنیش رام دین 29، کیرن پولارڈ 16، جیسن ہولڈر0 اور کارلوس بریتھ ویٹ نے 3 رنز بنائے۔ سیمیولز نے بانوے رنز کی اننگز کھیلی۔ کینگروز نو پوائنٹس کے ساتھ سرفہرست ہیں۔
