کراچی : ڈی جی رینجرز کی زیر صدارت اجلاس میں دہشت گردوں اور عسکری ونگز کے خلاف سخت ایکشن کا فیصلہ کرلیا گیا ہے، وزیر اعلی نے بھی کراچی آپریشن مزید تیز کرنے کی ہدایت کردی۔
تفصیلات کے مطابق چیف جسٹس سندھ کے بیٹے کا اغوا، پھر امجد صابری کا قتل کراچی کے امن میں خلل ڈالنے والوں سے آہنی ہاتھوں سے نمٹنے کی تیاری کرلی گئی ہے، ڈی جی رینجرز میجر جنرل بلال اکبر کی زیر صدارت اہم اجلاس ہوا، جس میں دہشت گردوں اور عسکری ونگز کے خلاف بلاتفریق سخت ایکشن کا فیصلہ کرلیا گیا ہے۔
رینجرز کی اعلی سطح نشست میں مختلف سیکٹرز کمانڈرز نے شرکت کی۔ حالیہ دہشتگردی اور ٹارگٹ کلنگ کےمحرکات کا تفصیلی جائزہ لیاگیا۔
اس سے قبل ڈی جی رینجرز نے وزیراعلیٰ سندھ سے بھی ملاقات کی، اس موقع پر قائم علی شاہ نے کراچی آپریشن میں مزید تیزی لانے کی ہدایت کی۔
