دمشق : روس کے فوجی حکام کا کہنا ہے کہ شام کے شمالی علاقے میں باغیوں نے اس کے ایک ہیلی کاپٹر کو نشانہ بنایا جس کے نتیجے میں پانچ افراد جاں بحق ہوگئے.
تفصیلات کے مطابق روسی وزارت دفاع کے حکام کا کہنا ہے کہ شام کے شمالی علاقے میں اس کے ہیلی کاپٹر کو نشانہ بنایا گیا،ایم آئی ایٹ ہیلی کاپٹر میں پانچ افراد سوار تھے.
روسی حکام کے مطابق ہیلی کاپٹر حلب میں امداد پہنچانے کے بعد واپس آ رہا تھا،ابھی تک یہ واضح بھی نہیں ہو سکا کہ باغیوں کے کس گروپ نے ہیلی کاپٹر کو گرایا ہے.
روس شامی صدر بشارالاسد کے قریبی اتحادی ہے اور یہ حکومتی فورسز کو باغیوں کے خلاف کارروائیوں میں فضائی مدد فراہم کر رہا ہے.
اس سے پہلے رواں برس مئی میں سیٹیلائیٹ تصاویر سے پتا چلا تھا کہ شام میں سٹریٹیجک اعتبار سے اہم اور روسی فورسز کے زیر استعمال اڈے کو ’دولتِ اسلامیہ‘ کی جانب سے حملے کے بعد شدید نقصان پہنچا.
*دمشق: داعش نے روس کا ہیلی کاپٹر مار گرایا،دو پائلٹس ہلاک
اس واقعے سے پہلے گزشتہ ماہ شام کے شہرتدمرکے اوپر پرواز کر رہا تھا کہ داعش کے عسکریت پسندوں نے اسے فائرنگ کرکے نشانہ بنایا،جس کے نتیجے میں دو روسی فوجی پائلٹ ہلاک ہو گئے تھے.
واضح رہے کہ حملے کی ذمہ داری دہشت گرد نتظیم داعش نے قبول کی تھی.
