اسلام آباد : ملک بھر سے حج آپریشن کا آغاز ہوگیا ہے، جو چار ستمبر تک جاری رہے گا، اسلام آباد سے قومی ائیرلائن کی پہلی پرواز تین سواٹھائیس عازمین حج کولے کرحجاز مقدس کیلئے روانہ ہوگئی۔
پاکستان سے عازمین حج کا فریضہ حج کی ادائیگی کیلئے حجاز مقدس کا سفر آج سے شروع ہوگیا، اسلام آباد سے قومی ائیرلائن کی پہلی پرواز تین سو اٹھائیس عازمین حج کو لے مدینہ کیلئے روانہ ہوگئی۔
وفاقی وزیر مذہبی امور سردار محمد یوسف نے عازمین حج کو رخصت کرتے ہوئے کہا کہ عازمین حج سعودی عرب میں ملک کے سفیر ہیں، استطاعت سے بڑھ کر عازمین حج کو سہولیات فراہم کر رہے ہیں۔
مزید پڑھیں : پی آئی اے و دیگر نجی ائیرلائنز کا حج آپریشن آج سے شروع
دوسری جانب کراچی سے نجی ائیرلائن کی پرواز تین سو سے زائد عازمین حج کو لے کر حجاز مقدس کیلئے روانہ ہوئی، لاہور سے بھی پہلی حج پرواز دوسو بیس مسافروں کو لے کر مدینہ مورہ کیلئے روانہ ہوئی۔
اس موقع پر عازمین حج کے عزیزو اقارب کی بڑی تعداد انہیں رخصت کرنے کیلئے ائیرپورٹس پر موجود تھیں، اسلام آباد، کراچی اور لاہور سے آٹھ سو اڑسٹھ عازمین حج فریضہ حج کی ادائیگی کیلئے حجاز مقدس روانہ ہوگئے۔
پی آئی اے اس سال ملک کے 10 شہروں سے عازمین کو حجاز مقدس پہنچائے گی، جن میں اسلام آباد، کراچی، لاہور، پشاور، کوئٹہ، سیالکوٹ، فیصل آباد، ملتان ، سکھر اور رحیم یار خان شامل ہیں۔
