سرگودھا : سرگودھا کے نجی اسکول میں سمر کیمپ کے دوران بچوں سے جنسی زیادتی کے انکشاف پراسکول پرنسپل سمیت 4 اساتذہ کے خلاف مقدمہ درج کرکے ایک ٹیچر کو حراست میں لے لیا گیا۔
ذرائع کے مطابق سرگودھا کے علاقہ اقبال کالونی کے رہائشی حیدر علی نامی شخص نے تھانہ اربن ایریا میں مقدمہ درج کرواتے ہوئے مؤقف اختیار کیا کہ واٹر سپلائی روڈ پر واقع نجی اسکول میں دینی تعلیم دینے والے استاد نے اس کے 10سالہ بھانجے کو جنسی زیادتی کا نشانہ بنا یا ہے۔
درخواست گزار نے اپنی درخواست میں تفصیلات بتاتے ہوئے کہا کہ میرے بھانجے کو اسکول میں جاری سمر کیمپ کے دوران زیادتی کا نشانہ بنایا گیااور اُس نجی اسکول میں دیگر اساتذہ نے بھی بچوں کو زیادتی کانشانہ بنایا ہے لیکن لوگ بدنامی کے ڈر سے سامنے آنے سے کترا رہے ہیں۔
درخواست گذار نے شکوہ کیا کہ شکایات کے باوجود اسکول کے پرنسپل نے کوئی کارروائی نہیں کی جس پر اسکول کے پرنسپل سمیت 4اساتذہ کے خلاف مقدمہ درج کرکے کہ بچے سے زیادتی کے الزام میں ایک استاد کو حراست میں لے لیا ہے اور بچے کا میڈیکل کروانے کا بھی حکم دے دیا ہے۔
پولیس کا کہنا ہے اسکول کے طلبہ سے زیادتی کا یہ پہلا واقعہ سامنے آیا ہے اس سے قبل کسی والدین نے اس حوالے سےکوئی شکایت نہیں کی تھی تاہم اب شکایت ملنے پر قانونی کارروائی شروع کر کے ملزمان کو کیفر کردار تک پہنچانے کا تہیہ کر لیا گیا ہے۔
